路加福音 23
喺彼拉多面前受審1 成羣嘅人起嚟,將耶穌解到彼拉多前,
2 控告佢話:「我哋發現此人煽動我哋嘅同胞,叫我哋唔好向皇上納稅,又自稱係基督,係王。」
3 彼拉多問耶穌:「你係猶太人嘅王咩?」耶穌答話:「你講得對。」
4 於是彼拉多向祭司長同羣眾話:「我查唔出此人有乜嘢罪。」
5 但係佢哋越加堅持話:「佢藉傳教,喺猶太全境煽動民眾,從加利利開始,到呢處。」
喺希律面前6 彼拉多一聽聞呢啲話就問:「呢個係加利利人咩?」
7 佢一知道耶穌係從希律嘅轄區嚟嘅,就將佢送到希律處。〈嗰時希律亦喺耶路撒冷。〉
8 希律睇見耶穌,就極歡喜;因為佢聽聞關於耶穌嘅事,早就想見佢,希望得見耶穌顯個神蹟。
9 因此,佢問耶穌好多問題,但耶穌一句話都唔回答。
10 祭司長同經學教師上前,極力控告佢。
11 希律同佢嘅士兵戲弄佢,侮辱佢。替佢着上一件華麗嘅長袍,送佢返彼拉多處。
12 嗰日,希律同彼拉多成咗朋友;喺以前兩人有仇怨。
被判死刑13 彼拉多召集祭司長、民間嘅領袖,同民眾,
14 對佢哋話:「你哋將呢個人解到我處,控告佢煽動人民;我喺你哋面前審問佢,但查唔出佢犯過你哋所控告嘅任何罪。
15 連希律亦查唔出佢有罪,將佢送返嚟呢處。可見佢冇做過乜嘢應該死嘅事。
16 故此,我要叫人鞭打佢,然後將佢釋放。」
17 〈每逢逾越節,彼拉多都照例為佢哋釋放一個囚犯。〉
18 羣眾齊聲叫話:「殺咗佢!釋放巴拉巴俾我哋!」
19 〈巴拉巴曾喺城裏作亂,殺過人,因此被押落監。〉
20 彼拉多想釋放耶穌,就再勸羣眾。
21 但佢哋更大聲叫話:「釘佢十字架!釘佢十字架!」
22 彼拉多第三次對佢哋話:「佢究竟犯咗乜嘢罪呢?我查唔出佢有該死嘅罪。我要叫人鞭打佢,將佢釋放。」
23 羣眾繼續大聲叫,堅持將耶穌釘十字架;佢哋嘅呼聲終得勝。
24 於是彼拉多照佢哋嘅要求宣判,
25 將嗰個作亂殺人、押喺監嘅兇手釋放,又將耶穌交俾佢哋,任佢哋處置。
耶穌被釘十字架26 士兵將耶穌帶走,途中遇見一個從鄉下入城嘅古利奈人,名西門。佢哋捉住佢,將十字架放喺佢身上,叫佢狽住,跟隨耶穌。
27 一大羣人跟隨耶穌,其中有啲婦女為佢悲傷哀哭。
28 耶穌轉身,對佢哋話:「耶路撒冷嘅女呀!唔好為我喊,要為你哋自己同你哋嘅仔女喊!
29 因為日子將到,人必話:『未生育、未懷過胎、未餵過奶嘅,有福咯!』
30 嗰時,人要對大山話:『傾倒喺我哋身上!』對小山話:『遮住我哋!』
31 佢哋若對青綠嘅樹木做咗噉樣嘅事,對枯乾嘅樹木又將點樣呢?」
32 佢哋同時帶嚟兩個囚犯,同耶穌一齊處死。
33 佢哋到咗一處,叫「髑髏岡」,將耶穌釘喺十字架上,同時又釘兩個囚犯,一個喺佢右邊,一個喺佢左邊。
34 〈耶穌話:「父呀,赦免佢哋,因為佢哋唔知道自己所做嘅事。」〉佢哋抽籤嚟分耶穌嘅衣服。
35 民眾企喺處嚟睇,猶太嘅領袖嗤笑佢話:「佢拯救別人!佢若係上帝揀選嘅基督,就可以救自己喇!」
36 士兵亦同樣譏笑佢,佢哋上前,拎酸酒俾佢,
37 話:「你若係猶太人嘅王,就可以救自己喇!」
38 喺佢頭上有牌寫落話:「呢個係猶太人嘅王。」
39 兩個同佢一齊釘嘅囚犯,一個開口侮辱佢話:「你唔係基督咩?可以救自己同我哋喇!」
40 但另外一個責備佢話:「我哋同樣受刑,你重唔怕上帝咩?
41 我哋受刑係應當嘅;我哋所受嘅,正係我哋應得嘅報應。但係佢未有做過一件壞事。」
42 於是佢對耶穌話:「耶穌呀,你做王時,求你記念我!」
43 耶穌對佢話:「我話你知,今日你將同我一齊喺樂園裏。」
耶穌嘅死44 大約喺中午,日光消失,黑暗遮蓋大地,直到下午三點鐘。
45 懸掛喺聖殿裏嘅帳幔裂成兩半。
46 耶穌大聲叫:「父呀!我將自己嘅靈魂交喺你手。」講完,佢斷氣而死。
47 百夫長睇見呢件事嘅經過,就頌讚上帝話:「呢個真係義人!」
48 圍觀嘅民眾睇見呢一切,都悲傷捶胸返去。
49 所有同耶穌熟識嘅人,同從加利利跟隨佢嚟嘅婦女,都企喺遠處睇呢啲事嘅經過。
耶穌嘅安葬50 有一個從猶太亞利馬太城嚟嘅人,名叫約瑟。呢個人良善正直,一向盼望上帝國嘅。佢雖然係議會議員,但冇附和眾人嘅計謀同行為。
51 拼於上節
52 佢到彼拉多前要求耶穌嘅遺體,
53 將遺體攞落嚟,用麻紗包好,安放喺一個由巖石鑿成嘅墳墓裏─呢個墳墓重未葬過人。
54 嗰日係預備日,安息日將近到。
55 從加利利跟隨耶穌嚟嘅婦女同約瑟一齊去,睇見墳墓,亦睇見耶穌嘅遺體點樣被安放喺裏面。
56 佢哋返去,為佢嘅遺體預備香料同香油。佢哋遵照律法嘅規定,喺安息日休息。