Library · yue

路加福音 3

施洗約翰嘅傳道

1 羅馬皇帝提庇留在位第十五年,本丟彼拉多做猶太總督,希律做加利利王,佢兄弟腓力做以土利亞同特拉可尼王,呂撒聶做亞比利尼王,

2 亞那同該亞法做大祭司。嗰時,撒迦利亞嘅仔約翰喺曠野,上帝嘅話臨到佢。

3 佢到約但河一帶地區,宣傳話:「你哋要離棄罪惡,接受洗禮,上帝就赦免你哋嘅罪。」

4 正照先知以賽亞書所記載:「喺曠野有人呼叫話:為主準備好佢嘅道路,修直佢要走嘅路徑。

5 一切山谷都要填滿;大小山岡都要削低。彎曲嘅路徑要修直;崎嶇嘅道路要剷平。

6 全人類都要睇見上帝嘅救恩。」

7 人羣擠擁,出嚟接受約翰嘅洗禮。約翰對佢哋話:「你哋毒蛇之類!上帝嘅審判快到,你哋以為能逃避咩?

8 要用行為證明你哋已經離棄罪惡。唔好自以為亞伯拉罕係你哋嘅祖宗就可以逃避審判。我話你哋知,上帝能從呢啲石頭為亞伯拉罕造出子孫嚟!

9 斧頭已經放喺樹根上,凡唔結好果嘅樹都要斬落嚟,丟喺火中。」

10 羣眾問佢:「噉樣,我哋要做乜嘢呢?」

11 約翰答話:「有兩件內衣嘅,要分一件俾冇嘅;有食物嘅,都要噉做。」

12 有啲收税嘅亦嚟想受洗禮;佢哋問約翰:「老師,我哋要做乜嘢呢?」

13 佢答話:「唔好收取法定以外嘅税金。」

14 有啲當兵嘅亦嚟問佢:「我哋呢?要做啲乜嘢呢?」佢答話:「唔好強索金錢,唔好敲詐;要以所得嘅糧餉為足。」

15 人民仰望基督來,心裏揣度,或者約翰就係基督。

16 因此約翰對佢哋話:「我用水同你哋施洗;但將有一位能力比我更大嘅要嚟,我替佢脱鞋都唔配。佢要用聖靈同火為你哋施洗。

17 佢手拎住簸箕,篩清穀物,收麥入倉;糠,就用永不熄滅嘅火嚟燒。」

18 約翰向人民傳福音,用好多唔同嘅方法勸佢哋。

19 但係約翰譴責希律王,因為希律娶咗佢弟婦希羅底,又做咗好多壞事。

20 後來佢又加多一件更嚴重嘅壞事,即係鎖約翰喺監。

耶穌接受洗禮

21 一般人民都接受洗禮,耶穌亦嚟受洗。佢禱告時,天打開,

22 聖靈降臨喺佢身上,形狀好似白鴿。從天上有聲出嚟,話:「你係我嘅愛子;我歡喜你。」

耶穌嘅家譜

23 耶穌開始傳道時,年紀約三十歲。喺人嚟睇,佢係約瑟嘅仔,約瑟係希里嘅仔,

24 希里係瑪塔嘅仔,瑪塔係利未嘅仔,利未係麥基嘅仔,麥基係雅拿嘅仔,雅拿係約瑟嘅仔,

25 約瑟係瑪他提亞嘅仔,瑪他提亞係亞摩斯嘅仔,亞摩斯係拿鴻嘅仔,拿鴻係以斯利嘅仔,以斯利係拿該嘅仔,

26 拿該係瑪押嘅仔,瑪押係瑪他提亞嘅仔,瑪他提亞係西美嘅仔,西美係約瑟嘅仔,約瑟係猶大嘅仔,

27 猶大係約亞拿嘅仔。約亞拿係利撒嘅仔,利撒係所羅巴伯嘅仔,所羅巴伯係撒拉鐵嘅仔,撒拉鐵係尼利嘅仔。

28 尼利係麥基嘅仔,麥基係亞底嘅仔,亞底係哥桑嘅仔,哥桑係以摩當嘅仔,以摩當係珥嘅仔,

29 珥係約細嘅仔。約細係以利以謝嘅仔,以利以謝係約令嘅仔,約令係瑪塔嘅仔,瑪塔係利未嘅仔。

30 利未係西緬嘅仔,西緬係猶大嘅仔,猶大係約瑟嘅仔,約瑟係約南嘅仔,約南係以利亞敬嘅仔。

31 以利亞敬係米利亞嘅仔,米利亞係買南嘅仔,買南係瑪達他嘅仔,瑪達他係拿單嘅仔,拿單係大衛嘅仔。

32 大衛係耶西嘅仔,耶西係俄備得嘅仔,俄備得係波士嘅仔,波士係撒門嘅仔,撒門係拿順嘅仔。

33 拿順係亞米拿達嘅仔,亞米拿達係亞民嘅仔,亞民係亞尼嘅仔,亞尼係希斯崙嘅仔,希斯崙係法勒斯嘅仔,法勒斯係猶大嘅仔,

34 猶大係雅各嘅仔,雅各係以撒嘅仔,以撒係亞伯拉罕嘅仔,亞伯拉罕係他拉嘅仔,他拉係拿鶴嘅仔,

35 拿鶴係西鹿嘅仔,西鹿係拉吳嘅仔,拉吳係法勒嘅仔,法勒係希伯嘅仔,希伯係沙拉嘅仔,

36 沙拉係該南嘅仔,該南係亞法撒嘅仔,亞法撒係閃嘅仔,閃係挪亞嘅仔,挪亞係拉麥嘅仔,

37 拉麥係瑪土撒拉嘅仔,瑪土撒拉係以諾嘅仔,以諾係雅列嘅仔,雅列係瑪勒列嘅仔,瑪勒列係該南嘅仔,

38 該南係以挪士嘅仔,以挪士係塞特嘅仔,塞特係亞當嘅仔,亞當係上帝嘅仔。