Library · yue

路加福音 4

耶穌受試探

1 耶穌從約但河返嚟,得聖靈充滿。聖靈帶佢到曠野,

2 喺嗰處四十日,受魔鬼試探。嗰時,佢乜嘢都唔食,日期一過,佢見肚餓。

3 魔鬼對佢話:「你若果係上帝之子,就吩咐呢嚿石變成食物喇!」

4 耶穌答話:「聖經話:『人嘅生存唔係單靠食物。』」

5 魔鬼又帶佢到一個好高嘅地方,轉眼之間等佢睇見天下萬國,對佢話:

6 「你若向我跪拜,我就將呢一切權柄同財富都俾你;因為呢一切都已經交俾我,我願意俾邊個就俾邊個。」

7 拼於上節

8 耶穌話:「聖經有寫落話:『當拜主─你嘅上帝,單要事奉佢!』」

9 魔鬼又帶耶穌去耶路撒冷,使佢企喺聖殿頂嘅最高處,對佢話:「你若係上帝之子,就從呢處跳落去;

10 因為聖經話:『上帝將吩咐佢嘅天使保護你;

11 用手托住你,免致你嘅腳踢親石。』」

12 耶穌答話:「聖經話:『唔好試探主─你嘅上帝。』」

13 魔鬼用盡各樣嘅試探,就暫時離開耶穌。

耶穌開始喺加利利傳道

14 耶穌返到加利利;聖靈嘅能力與佢同在。佢嘅名聲傳遍嗰一帶地區。

15 佢喺各會堂教導人,人人都稱讚佢。

耶穌喺拿撒勒被厭棄

16 耶穌嚟到拿撒勒─佢長大嘅地方。喺安息日,佢照常去猶太會堂。佢企起身讀聖經,

17 有人將先知以賽亞書俾佢。佢打開,搵到一處寫落話:

18 「主嘅靈臨到我,因為佢膏立我,揀選我,要我向貧窮人傳福音。佢差遣我報告:被擄嘅,得釋放;盲眼嘅,得睇見;受欺壓嘅,得自由;

19 又報告主拯救佢子民嘅禧年。」

20 耶穌將書卷捲起,交返俾會堂助理,然後坐低。全會堂嘅人都定眼睇住佢,

21 佢就對佢哋話:「今日,你哋所聽見嘅呢段經文已經應驗咯。」

22 眾人對佢有深刻嘅印象,對佢所講嗰啲動人嘅話大感驚奇。佢哋話:「呢個人唔係約瑟嘅仔咩?」

23 耶穌對佢哋話:「你哋必定會引用呢一句俗語對我話:『醫生呀,醫好你自己喇!』你哋重要對我話:『我哋所聽到你喺迦百農做過嘅事,亦應該喺你自己嘅家鄉做出嚟!』」

24 耶穌又話:「我實在話你哋知,先知喺自己嘅家鄉係從來唔受人歡迎嘅。

25 喺先知以利亞嘅時代,以色列中有好多寡婦。嗰時,連續三年半天旱無雨,遍地大饑荒。

26 但以利亞並冇奉派去搵佢哋中任何人,只到西頓,撒勒大嘅一個寡婦處。

27 喺先知以利沙嘅時代,以色列中有好多患痲瘋病嘅,但係除咗敘利亞人乃縵,亦冇一個得到潔淨。」

28 聽聞此說話,全會堂嘅人都極之惱怒。

29 佢哋起身,將佢拉到城外,帶佢到山崖〈佢哋嘅城建喺山上〉,想將佢推落去。

30 耶穌從佢哋中直行而去。

一個被污鬼迷嘅人

31 耶穌去加利利省嘅迦百農城。安息日,喺嗰處教導人。

32 聽見佢教訓嘅人都好驚奇,因為佢嘅話滿有權威。

33 喺會堂裏,有一個被污鬼嘅靈所迷嘅人,大聲叫話:

34 「拿撒勒嘅耶穌,你點解干擾我哋?你係嚟除滅我哋咩?我知你係邊個;你係上帝嘅聖者!」

35 耶穌命令嗰隻污鬼話:「咪嘈,快啲從呢個人身上出嚟!」污鬼喺眾人面前將嗰個人推倒,就從佢身上出嚟,一啲都冇傷害佢。

36 眾人非常驚奇,彼此議論話:「呢啲係乜嘢道理呢?此人居然有權威同能力指揮污靈,污靈就出去!」

37 於是耶穌嘅名聲傳遍嗰一帶地區。

耶穌醫好好多病人

38 耶穌離開會堂,去到西門嘅家。西門嘅岳母正發高燒;佢哋向耶穌求助。

39 耶穌去睇佢,企喺佢旁邊,斥責熱病,熱就退去。佢立刻起身,接待佢哋。

40 日頭落山時,好多患各樣疾病嘅人被親友帶嚟見耶穌;耶穌替佢哋按手,醫好佢哋。。

41 又有鬼從多人身上出嚟,呼叫:「你係上帝之子!」耶穌斥責佢哋,唔准佢哋講話,因為佢哋知佢係基督。

耶穌喺會堂傳道

42 天光時,耶穌出城去偏僻嘅地方。眾人到處搵佢,搵到,想挽留佢,唔想佢離開。

43 但係耶穌對佢哋話:「我亦要喺其他城鎮傳上帝國嘅福音,因為我正係為呢啲工作受差遣嚟嘅。」

44 於是,耶穌到猶太各會堂傳道。