Library · yue

約翰福音 1

生命之道

1 宇宙被造以前,道已經存在。道與上帝同在;道就係上帝。

2 喺太初,道就與上帝同在。

3 上帝藉佢創造萬有;喺整個創造中,冇一樣唔係藉佢造嘅。

4 道係生命嘅根源,此生命將光賜俾人類。

5 光照射黑暗,黑暗從未勝過光。

6 有一人,名叫約翰,係上帝打發嚟嘅使者。

7 佢嚟為光作證,俾眾人聽見佢嘅信息而信。

8 佢本身唔係個光,係為光作證。

9 個光係真光,嚟到世上照亮全人類。

10 道喺世上,上帝藉佢創造世界,而世人竟唔認識佢。

11 佢嚟到自己嘅地方,但自己嘅人唔接受佢。

12 凡接受佢嘅,即係信佢嘅人,佢就賜俾佢哋特權做上帝嘅仔女。

13 噉嘅人唔係由血統關係,唔係由人嘅性慾,亦唔係由男人嘅意願生嘅,乃係由上帝生嘅。

14 道成為人,住喺我哋中,充滿恩典同真理。我哋見佢嘅榮耀,正係父嘅獨生子當得嘅榮耀。

15 約翰為佢作證,呼叫話:「關於佢,我曾經講過:『佢喺我之後嚟,但比我偉大;因為我出世之前,佢巳經存在。』」

16 從佢嘅豐盛,我咃領受過恩典,而且恩上加恩。

17 上帝透過摩西頒佈律法,但恩典同真理都係透過耶穌基督而嚟。

18 從來冇人見過上帝,只有獨生子即與父最親密嗰一位,將佢啟示出嚟。

施洗約翰嘅信息

19 以下係約翰嘅見證。當時,耶路撒冷嘅猶太人派祭司同利未人去見約翰,問佢:「你係邊個?」

20 約翰冇拒絕回答,但坦白對佢哋話:「我唔係基督。」

21 佢哋就問:「噉樣,你係邊個?係以利亞咩?」 約翰答話:「我唔係。」佢哋又問:「係嗰位先知咩?」佢再答話:「唔係。」

22 跟住佢哋話:「請話俾我哋知,你到底係邊個,等我哋回覆派我哋嚟嘅人。你自己講,你係邊個?」

23 約翰引用先知以賽亞嘅話答,話:「我就係喺曠野呼叫嘅聲音:『為主修直佢要行嘅道路!』」

24 法利賽人派嚟嘅人

25 質問約翰:「你既然唔係基督,唔係以利亞,亦唔係嗰位先知,你點解施洗呢?」

26 約翰答話:「我用水施洗;但有一位企喺你哋中,係你哋唔認識嘅,

27 佢喺我之後嚟,我幫佢解鞋帶都唔配。」

28 呢啲事發生喺約但河對岸嘅伯大尼,約翰施洗嘅地方。

上帝嘅羔羊

29 第二日,約翰見耶穌向佢走過嚟,就話:「睇吓,上帝嘅羔羊,除去世人罪惡嘅!

30 呢位就係我講過:『佢喺我之後嚟,但比我偉大;因為我出世之前,佢已經存在。』

31 我唔認識佢;現今我嚟,用水施洗,使以色列人認識佢。」

32 約翰又作證話:「我睇見聖靈好似白鴿從天上降落喺佢身上。

33 我先前唔認識佢,但打發我用水施洗嘅上帝對我話:『你睇見聖靈降落喺邊個身上,嗰個就係要用聖靈施洗嘅。』

34 我巳經睇見,所以向你哋作證,佢就係上帝之子。」

初次選召門徒

35 又過一日,約翰同佢兩個門徒喺處;

36 睇見耶穌經過,就話:「睇吓,上帝嘅羔羊!」

37 兩個門徒一聽見,就跟隨耶穌。

38 耶穌轉身,睇見佢哋,就問:「你哋想要乜嘢?」佢哋回答:「拉比,你住喺邊處?」〈「拉比」嘅意思係老師。〉

39 耶穌話:「你哋嚟睇喇!」佢哋就跟佢去,睇到佢住嘅地方,當日就同佢住。〈嗰時大約係下午四點鐘。〉

40 聽見約翰嘅話而跟從耶穌嗰兩個人,一個係西門彼得嘅細佬安得烈。

41 佢搵到佢嘅大佬西門,對佢話:「我哋搵到彌賽亞喇。」〈彌賽亞嘅意思係基督。〉

42 於是佢帶西門去見耶穌。耶穌睇住佢,話:「你係約翰嘅仔西門,你嘅名要叫做磯法。」〈磯法同彼得同義,意思係「磐石」〉。

呼召腓力同拿但業

43 又過一日,耶穌決定去加利利省。佢遇見腓力,對佢話:「嚟跟從我!」

44 〈腓力係伯賽大人,同安得烈彼得同郷。〉

45 腓力搵到拿但業,對佢話:「摩西喺律法書所寫同眾先知所記嗰一位,我哋已經搵到咯。佢係約瑟嘅仔,拿撒勒人耶穌。」

46 「拿但業就問:拿撒勒會出乜嘢好嘅呢?」腓力話:「你嚟睇喇!」

47 當耶穌睇見拿但業向佢行過嚟,就話:「睇吖,佢係一個真正嘅以色列人;佢心裏亳無詭詐!」

48 拿但業問佢;「你點樣認識我呢?」耶穌答話:「當你喺無花果樹下,腓力未叫你之前,我已經睇見你。」拿但業話:

49 「老師,你係上帝之子;係以色列嘅王!」

50 耶穌話;「因為我話,我睇見你喺無花果樹下,你就信咩?你將睇見比呢啲更大嘅事!」

51 佢又對佢哋話:「我實在話你哋知,你哋將要睇見天開咗,上帝嘅天使喺人子身上,上去落嚟。」