Library · yue

約翰福音 2

迦拿嘅婚宴

1 過兩日,喺加利利嘅迦拿城有人舉行婚禮。耶穌嘅母親喺嗰處;

2 耶穌同佢嘅門徒亦受邀請去參加婚宴。

3 酒飲嘥,耶穌嘅母親對佢話:「佢哋冇酒咯。」

4 耶穌話:「婦人呀,請你唔好勉強我做乜嘢,我嘅時侯重未到呀。」

5 耶穌嘅母親對僕人話:「佢要你哋做乜,就照佢嘅話去做喇。」

6 喺嗰處有六個石缸,係猶太人行潔淨禮時用嘅,每一個石缸可以裝水約一百公升。

7 耶穌對僕人話:「將水缸裝滿水。」佢哋就倒水入缸,直到缸口。

8 耶穌又話:「現今可以拂啲出嚟,送俾管筵席嘅人。」佢哋就送去。

9 管筵席嘅試吓啲已經變成酒嘅水,唔知道呢啲酒係由邊處嚟嘅〈只有拂水嘅僕人知道〉,就叫新郎嚟,

10 對佢話:「人哋都係先擺上好酒,等客人飲夠然後致擺普通嘅酒,你反而將最好嘅酒留到現今!」

11 呢件係耶穌行嘅第一個神蹟,係喺加利利迦拿城行嘅。此事顯出佢嘅榮耀;佢嘅門徒都信佢。

12 呢件事之後,耶穌同佢母親、細佬,同門徒去迦百農,喺嗰處住咗幾日。

耶穌潔淨聖殿

13 猶太人嘅逾越節快到,耶穌上去耶路撒冷。

14 喺聖殿嘅外院,睇見有人喺處販賣牛、羊、白鴿,又有人坐喺處兌換銀錢。

15 佢就拎繩做鞭,將牛羊從聖殿趕出,將兌換銀錢嘅檯推倒,錢幣跌到一地都係。

16 佢又對賣白鴿嘅人話:「將呢啲嘢搬走,唔好將我父嘅聖殿當做街市!」

17 佢嘅門徒就記得聖經話:「上帝呀,我對你嘅聖殿大發熱心,如火燃燒!」

18 故此猶太人就質問佢話:「你能行乜嘢神蹟俾我哋睇,證明你有權做呢啲事呢?」

19 耶穌話:「你哋拆毀呢座聖殿,三日內,我將佢重建起嚟。」

20 佢哋話:「呢座聖殿建造咗四十六年,你能喺三日內重建咩?」

21 其實,耶穌講嘅聖殿係指佢自己嘅身體。

22 耶穌從死裏復生之後,佢嘅門徒記起佢曾經講過呢啲話,就信聖經同耶穌所講嘅。

耶穌洞悉人心

23 耶穌喺耶路撒冷過逾越節時,好多人睇見佢行嘅神蹟,就信佢。

24 但係耶穌唔信任佢哋,因為佢對所有嘅人都有深刻嘅認識。

25 佢唔需要人話佢知關於人性嘅事,因為佢洞悉人嘅內心。