Library · yue

約翰福音 21

1 呢啲事之後,耶穌再一次喺提比利湖邊向門徒顯現。呢次顯現嘅經過係噉樣:

2 當時,西門彼得、花名雙胞胎嘅多馬、加利利嘅迦拿人拿但業、西庇太嘅兩個仔,同另外兩個門徒都喺埋一齊。

3 西門彼得對佢哋話:「我去攞魚。」佢哋話:「我哋同你一齊去。」於是佢哋出去,落船;但係成晚都冇捉到乜嘢。

4 差唔多天光時,耶穌企喺水邊,但係門徒唔知道佢係耶穌。

5 耶穌對佢哋話:「朋友,你哋捉到魚冇?」佢哋答話:「冇。」

6 耶穌話:「將網撒落船嘅右邊,嗰邊有魚。」佢哋就撒網落去,但係拉唔上嚟,因為網太多魚呀。

7 耶穌所愛嘅嗰個門徒對彼得話:「係主!」西門彼得一聽講係主,就立刻拎件外衣披喺身上〈佢嗰時係赤身〉,跳入水。

8 其餘嘅門徒撐住小船埋岸,將成網嘅魚拖上嚟。當時佢哋離岸唔遠,約有一百公尺。

9 佢哋上岸後,睇見一堆炭火,上面有魚同餅。

10 耶穌對佢哋話:「將你哋啱啱攞嘅魚拎幾條嚟。」

11 西門彼得上船,將網拖到岸上;網裏都係大魚,一共一百五十三條。雖然有咁多魚,網都冇裂開。

12 耶穌對佢哋話:「你哋嚟食早飯喇。」冇一個門徒敢問佢:「你係邊個?」因為佢哋都知道係主。

13 耶穌就行過去,拎餅分俾佢哋,亦照樣將魚分開。

14 呢啲係耶穌從死裏復生之後,第三次向門徒顯現。

耶穌同彼得

15 佢哋食完之後,耶穌問西門彼得:「約翰嘅仔西門,你愛我比較呢啲人更深咩?」佢答話:「主呀,係,你知道我愛你。」耶穌話:「你餵養我嘅羊仔。」

16 耶穌第二次問:「約翰嘅仔西門,你愛我咩?」佢答話:「主呀,係,你知道我愛你。」耶穌對佢話:「你牧養我嘅羊。」

17 耶穌第三次再問:「約翰嘅仔西門,你愛我咩?」彼得因為耶穌一連三次問佢「你愛我咩?」就難過起嚟,對耶穌話:「主呀,你無所不知,你知道我愛你。」耶穌話:「你餵養我嘅羊。

18 我實在話你知,你年輕時,自己束上腰帶,隨意往來;但年老時,你要伸手出嚟,人哋將你綁住,帶你到唔願意去嘅地方。」

19 〈耶穌講呢啲話係指明彼得將會點樣死,嚟榮耀上帝。〉跟住,耶穌又對佢話:「你跟從我喇!」

耶穌同其他門徒

20 彼得轉身,睇見耶穌所愛嗰個門徒喺後面跟住〈嗰個門徒曾喺嗰晚食飯時挨近耶穌,問佢「主呀,要出賣你嘅係邊個?」〉

21 彼得睇見佢,就問耶穌:「主呀,此人將來點樣?」

22 耶穌答話:「若我要佢生存直等到我嚟,亦唔關你事,你跟從我喇!」

23 於是,呢啲話流傳喺跟從耶穌嘅人中,話嗰個門徒唔會死。其實,耶穌並冇講佢唔會死,而係話「若我要佢生存直等到我嚟,亦唔關你事。」

24 呢個就係為呢啲事做見證嘅嗰個門徒;佢將此事記錄落。我哋知道佢嘅見證係真嘅。

結語

25 耶穌所做嘅事重有好多,若係一一詳細記錄落嚟,我諗所寫嘅書,全個世界都容納唔到。