Library · yue

約翰福音 20

空墓

1 星期日清晨,天重未光,抹大拉嘅馬利亞來到墳墓,睇見墓門嘅石巳經移開。

2 佢就跑去搵西門彼得同耶穌所愛嘅門徒,對佢哋話:「有人將主由墳墓裏搬走咗,我哋唔知道佢哋將佢放喺邊處!」

3 彼得同嗰個門徒就出嚟去墳墓處。

4 兩個人一齊跑,但嗰個門徒比彼得跑得快,先到墳墓。

5 佢嗚低頭去睇,見麻紗重喺處,但係佢冇入去。

6 西門彼得住亦到;直入墳墓,睇見麻紗重喺處,

7 又睇見包耶穌嘅頭巾冇同麻紗放埋一處,係捲住,放喺另一邊。

8 首先到嘅嗰個門徒亦跟住入去墳墓;佢睇見就信。

9 〈佢哋重未明白聖經所講,佢必要從死裏復生嗰句話嘅意思。〉

10 於是兩個門徒返回自己處。

耶穌向抹大拉嘅馬利亞顯現

11 馬利亞重企喺墳墓外面哭。佢一邊哭,一邊低頭向墳墓裏頭睇,

12 睇見兩個白衣嘅天使,坐喺原本安放耶穌身體嘅地方,一個喺頭呢邊, 一個喺腳嗰邊。

13 佢哋問馬利亞:「婦人,你點解哭?」佢答話:「佢哋將我嘅主移走,我唔知道佢哋將佢放喺邊處!」

14 講完呢啲話,馬利亞轉身,睇見耶穌企喺嗰處,但係重未知道佢就係耶穌。

15 耶穌問佢:「婦人,你點解哭呢?你搵邊個呀?」馬利亞以為佢係看園嘅,就對佢話:「先生,若係你將佢移走嘅,請話俾我知,你將佢放喺邊處,等我去攞返嚟。」

16 耶穌話:「馬利亞!」馬利亞轉身,用希伯來話對佢話:「拉波尼!」〈意思就係「老師」。〉

17 耶穌話:「你唔好摸我,因為我重未上去見我嘅父。你去我嘅兄弟處,話俾佢哋知:『我要上去見我嘅父,亦即係你哋嘅父;去見我嘅上帝,亦即係你哋嘅上帝。』」

18 於是,抹大拉嘅馬利亞去話俾門徒知,話佢巳經睇見主,又傳達主對佢所講嘅話。

耶穌向門徒顯現

19 星穌日夜晚,耶穌嘅門徒聚集喺一處,門都閂埋,因為佢哋怕猶太人。嗰時,耶穌顯現,企喺佢哋中,話:「願你哋平安。」

20 講完呢啲話,佢將自己嘅手同肋旁俾佢哋睇。門徒睇見主,非常歡喜。

21 耶穌又對佢哋話:「願你哋平安。父點樣打發我,我照樣打發你哋。」

22 講完之後,佢向佢哋吹一口氣,話:「領受聖靈喇。

23 你哋赦免邊個嘅罪,邊個嘅罪就得赦免;你哋唔赦免邊個嘅罪,邊個嘅罪就唔得赦免。」

耶穌同多馬

24 當耶穌顯現時,十二門徒中有一個叫多馬〈花名雙胞胎〉佢冇同佢哋喺埋一齊。

25 所以其他嘅門徒對佢話:「我哋已經睇見主」。多馬對佢哋話:「除非我親眼睇見佢手上嘅釘痕,又用我嘅手指摸釘痕,用我手摸佢嘅肋旁,我就絕對唔信。」

26 一個禮拜之後,門徒又喺屋裏聚集;多馬亦同佢哋一齊。門亦閂埋,耶穌忽然顯現,企喺佢哋中,話:「願你哋平安。」

27 然後佢對多馬話:「將你嘅手指放喺呢處,睇吓我手;伸你嘅手出嚟,摸下我嘅肋旁。唔好疑惑,只要信!」

28 多馬話:「我嘅主,我嘅上帝!」

29 耶穌話:「你因為睇見我致信咩?嗰啲冇睇見而信嘅係有福呀!」

本書嘅目的

30 耶穌喺佢嘅門徒面前重行咗好多神蹟,但係冇記錄喺呢本書裏面。

31 本書記述嘅目的係令你哋信耶穌係基督,係上帝之子,並且使你哋因信佢而得生命。