Library · yue

使徒行傳 1

1 提阿非羅閣下:喺我所寫嘅第一部書內,我已經將耶穌嘅一切事蹟同教訓,由佢開始工作,

2 到佢被接升天嗰日,都敘述過。喺升天以前,佢藉聖靈嘅力量俾自己所選召嘅使徒好多指示。

3 受害後四十日中,佢曾向佢哋顯現多次,用唔同嘅方法證明自己係生嘅;佢俾佢哋睇見自己,又向佢哋講論上帝國嘅事。

4 當佢哋喺一齊時,佢吩咐佢哋:「唔好離開耶路撒冷,照我對你哋講過嘅,等候我父嘅應許。

5 約翰用水施洗,但幾日後你哋就受聖靈嘅洗禮。」

耶穌被接升天

6 使徒同耶穌聚集時,問耶穌:「主呀,你係唔係喺此時恢復以色列國嘅主權?」

7 耶穌對佢哋話:「嗰個時間同日期係我父藉自己嘅權柄定落嘅,唔係你哋可以知道嘅。

8 但聖靈臨到你哋處,你哋就必得到能力,喺耶路撒冷、猶太,同撒馬利亞全境,甚至到天涯海角,為我作證。」

9 講完呢啲話,耶穌喺佢哋睇住時被接升天;有一朵雲環繞住佢,將佢哋嘅視線遮住。

10 佢離去時,佢哋定眼望住天。忽然,有兩個着白衣嘅人企喺佢哋旁邊,

11 話:「加利利人呀,點解企喺呢處望住天呢?呢位離開你哋、被接升天嘅耶穌,你哋睇見佢點樣升天,佢亦將噉樣返嚟。」

接替猶大嘅人

12 使徒從橄欖山返去耶路撒冷;橄欖山離城約一公里。

13 佢哋入城,就上去佢哋住宿嘅樓;喺嗰處有彼得、約翰、雅各同安得烈、腓力同多馬、巴多羅買同馬太、亞勒腓嘅仔雅各、激進黨嘅西門,同雅各嘅仔猶大。

14 佢哋經常一齊同心禱告;當中亦有幾個婦女同耶穌嘅母親馬利亞,與及佢嘅兄弟。

15 過幾日有信徒嘅聚會,約有一百二十人參加。彼得企起,話:

16 「兄弟呀!聖靈藉大衛嘅口喺聖經上預言有關猶大帶人捉耶穌嘅事係必須實現嘅。

17 猶大本來被揀選分擔我哋嘅工作,與我哋同列。

18 佢用作惡賺嚟嘅錢買一塊地;喺嗰處,佢仆倒,五臟裂開而死。

19 住喺耶路撒冷嘅人都聽見此事,所以用佢哋嘅語言叫嗰塊地做亞革大馬,意思係「血田」。)

20 正如詩篇所寫:『願佢嘅住宅荒涼,冇人住喺裏面。』又有一處寫:『願別人取代佢嘅職份。』」

21 彼得接住話:「因此,必須有另外一人加入我哋嘅行列,一齊做主耶穌復生嘅見證人。此人必須喺主耶穌同我哋出入時─從約翰施洗開始到耶穌被接升天為止嗰一段期間─始終同我哋一齊嘅。」

22 拼於上節

23 於是,推選兩個人,約瑟(號巴撒巴,又名猶士都)同馬提亞。

24 佢哋禱告話:「主呀,你知道每人嘅心;求你指示我哋,呢兩位中邊位係你所揀選

25 嚟取代使徒職份嘅。此職份猶大已經捨棄,去咗佢應去嘅地方。」

26 講完,佢哋抽籤,喺兩人中抽出馬提亞;佢就加入十一使徒嘅行列。