Library · yue

使徒行傳 2

聖靈嘅降臨

1 五旬節嗰日,信徒聚集喺一處。

2 忽然有聲由天落嚟,好似一陣大風吹過嘅聲,充滿佢哋所坐嘅屋。

3 佢哋又睇見好似火燄嘅,散開停喺每個人身上。

4 佢哋都被聖靈充滿,按照聖靈所賜嘅口才講出別處嘅方言。

5 嗰時,有從世界各國嚟嘅虔誠猶太人住喺耶路撒冷。

6 佢哋一聽見呢啲聲,眾人就聚集喺一處,非常興奮,因為聽見信徒用佢哋本地嘅語言講話。

7 喺驚訝詫異中,佢哋話:「你睇,講呢啲話嘅人豈唔係加利利人咩?

8 點解我哋都聽見佢哋用我哋自己嘅土話講呢?

9 我哋中有帕提亞人、米太人、以攔人;重有從米所波大米、猶太、加帕多家、本都、亞西亞、

10 弗呂家、旁非利亞、埃及,同近古利奈嘅呂彼亞一帶地方嚟嘅人,亦有由羅馬嚟嘅,

11 包括猶太人同信猶太教嘅異邦人;此外有革哩底人同亞拉伯人。我哋竟然聽見佢哋用我哋本地嘅語言講上帝偉大嘅作為!」

12 佢哋又驚奇又困惑,彼此相問:「呢啲係乜嘢意思呢?」

13 又取笑信徒話:「佢哋不過係飲醉酒啫!」

彼得嘅信息

14 嗰時,彼得同其他十一個使徒企起。高聲話:「猶太同胞同所有住喺耶路撒冷嘅人呀!你哋要明白,留心聽我嘅話。

15 你哋以為呢啲人係飲醉酒咩?其實唔係,因為現今係朝早九點鐘。

16 呢啲係先知約珥所講嘅:

17 『上帝話:我喺世界末期,要將我嘅靈傾注俾每一個人。你哋嘅仔女要宣告我嘅信息;你哋嘅年輕人要睇見異象;你哋嘅老年人發奇異嘅夢。

18 喺嗰啲日子,我要將我嘅靈傾注出嚟,甚至俾我嘅奴僕同使女;佢哋要宣告我嘅信息。

19 我要喺天上顯神蹟,喺地上行奇事;有血,有火,有濃煙;

20 日頭要昏暗無光;月亮好似血一樣咁紅;喺主偉大榮耀嘅日子嚟到以前,呢一切都要發生。

21 到嗰時,凡呼求主名嘅人必得救。』

22 以色列同胞呀,你哋要聽我嘅話。拿撒勒人耶穌嘅神聖使命,由上帝藉佢行嘅神蹟、異能、奇事,好清楚噉向你哋顯示出嚟。此事你哋自己都知道,因為係發生喺你哋中。

23 上帝照自己嘅旨意同先見早已決定將耶穌交俾你哋;你哋藉不法嘅人將佢釘喺十字架上,殺咗佢。

24 但係上帝使佢從死者中復生,將死亡嘅痛苦釋放,因為死亡不能囚禁佢。

25 大衛曾經指住佢話:『我常見主喺我面前;佢喺我右邊,我不至於動搖。

26 因此,我心歡喜;我嘅言語充滿快樂。我嘅肉體,安居喺盼望中;

27 因為你唔會將我嘅靈魂留喺陰間,亦唔會容許你聖者見腐爛。

28 你已經指示我生命嘅道路;你在我前使我充滿喜樂。』

29 兄弟呀,關於先祖大衛嘅事,我必須坦白向你哋講明。佢不但死咗,埋葬;佢嘅墳墓到今日仍保存喺我哋呢處。

30 佢係先知,佢知道上帝對佢嘅應許:上帝曾發誓要從佢嘅子孫中立一個王坐喺佢嘅寶座上。

31 大衛預知上帝嘅計劃,所以當佢講到關於基督嘅復生,佢話:佢冇被留喺陰間;佢嘅肉體亦冇腐爛。

32 呢位耶穌,上帝已經使佢復生;我哋都係此事嘅見證人。

33 佢已經被高升喺上帝嘅右邊,並從佢父接受權柄將所應許嘅聖靈施予俾人,即係現今你哋所見所聞嘅。

34 大衛自己冇升到天上,但係佢話:『主對我主話:你坐喺我右邊,

35 等我使你嘅仇敵屈服喺你腳下。』

36 所以,以色列全體同胞呀,你哋要確實知道,你哋釘喺十字架上嘅耶穌,上帝已經立佢為主,為基督!」

37 眾人聽到呢啲話,心好似被㓤噉樣,就對彼得同其他嘅使徒話:「兄弟呀,我哋應當點樣做呢?」

38 彼得話:「你哋每人都要悔改,奉耶穌基督嘅名受洗,致令你哋嘅罪得赦,你哋就必領受所賜嘅聖靈。

39 因為上帝嘅應許係俾所有我哋嘅主上帝所呼召嘅人,即係你哋、你哋嘅仔女,同一切喺遠方嘅人。」

40 彼得又用好多話向佢哋作證,勸勉佢哋話:「你哋要救自己脫離此邪惡嘅人所要遭受嘅懲罰!」

41 於是領受佢嘅信息,就受洗禮;在嗰一日信徒約增加三千人。

42 佢哋專心向使徒領教,參加團契生活,分享愛筵,一齊禱告。

團契嘅生活

43 使徒行好多神蹟奇事;眾人都因此生敬畏嘅心。

44 全體信徒繼續一齊過團契嘅生活,所有物件都屬公用。

45 佢哋又賣咗田產家業,照各人嘅需要將錢分俾各人。

46 佢哋同心合意,日日喺聖殿裏聚會,又喺各人嘅家中分享愛筵,以歡喜純潔嘅心一齊食飯,

47 頌讚上帝,同眾人保持和睦嘅關係。主將得救嘅人日日加俾佢哋。