使徒行傳 15
耶路撒冷會議1 有啲人從猶太嚟到安提阿,開始教訓兄弟話:「除非你哋遵照摩西嘅律法接受割體,你哋不能得救。」
2 為此問題,保羅同巴拿巴兩人同佢哋發生劇烈嘅爭辯。因此,眾人決定派保羅、巴拿巴,同當地教會嘅幾個人去耶路撒冷,向使徒同長老請示。
3 於是教會替佢哋送行。旅途中,佢哋經過腓尼基同撒馬利亞,到處報告異邦人歸信上帝嘅事。所有嘅兄弟聽到此消息都好欣慰。
4 佢哋到耶路撒冷時,受教會、使徒,同長老接待。佢哋向眾人報告上帝藉佢哋所做嘅一切事。
5 但係有啲法利賽派嘅信徒企起話:「異邦人必須接受割禮,亦必須遵守摩西嘅律法。」
6 使徒同長老開會討論此問題。
7 經過長時間嘅辯論,彼得企起,話:「各位兄弟,你哋知道上帝早已從你哋中選召我,要我將福音嘅信息傳俾異邦人,使佢哋聽見而相信。
8 嗰位洞察人心嘅上帝將聖靈賜俾異邦人,如同賜俾我哋一樣,藉此表明佢亦接納異邦人。
9 喺我哋同佢哋之間,上帝冇任何分別,因為佢哋因信來潔淨佢哋嘅心。
10 即然噉樣,你咃現今點解要試探上帝,將我哋祖先同我哋自己所擔唔起嘅擔,放喺異邦信徒嘅頸上呢?
11 我哋相信我哋得救係由於主耶穌嘅恩典,係同佢哋一樣。」
12 眾人靜聽巴拿巴同保羅報告上帝藉佢哋喺異邦人中所行嘅一切神蹟奇事。
13 佢哋講完,雅各就話:「各位兄弟,請聽!
14 剛才西門講明上帝點樣眷顧異邦人,由佢哋中選召人嚟歸屬自己。
15 先知所講嘅話完全同呢啲相符。聖經噉樣記載:
16 『主話,此後我要返嚟,重建大衛倒塌嘅帳幕。我要從廢墟中重新建造,將佢建立起嚟。
17 致所有其餘嘅人,我所選召歸向我嘅異邦人,都要尋求主。
18 呢啲說話,係嗰位由遠古就指示呢啲事嘅主所講嘅。』」
19 雅各繼續話:「照我嘅睇法,我哋唔應該難為嗰啲歸向上帝嘅異邦人。
20 我哋應該寫信,吩咐佢哋唔好食祭過偶像不潔淨嘅食物,唔好有淫亂嘅行為,唔好食勒死嘅牲畜同血。
21 因為自古以來,每逢安息日,喺各會堂裏都有人宣讀摩西嘅律法,喺各城裏都有人傳佢嘅教導。」
寫俾異邦信徒嘅信22 嗰時,使徒同長老及全教會決定推選代表,派佢哋同保羅、巴拿巴一齊去安提阿。佢哋選出稱為巴撒巴嘅猶大同西拉。呢兩人一向為兄弟所尊重。
23 佢哋帶去嘅信噉樣寫:「使徒同做長老嘅兄弟問候喺安提阿、敘利亞、基利家所有嘅異邦兄弟!
24 我哋聽講有人從我哋處出去;佢哋講嘅話使你哋徬徨困惑。其實,我哋並冇吩咐佢哋去講嗰啲話。
25 所以我哋一齊商量,眾人同意選派代表到你哋處。佢哋要同我哋親愛嘅朋友,
26 即係為事奉我哋嘅主耶穌基督而不惜冒生命危險嘅巴拿巴同保羅同行。
27 我哋選派嘅係猶大同拉西;佢哋要當面話你哋知信中提起嘅事情。
28 因為聖靈贊同我哋,除咗一啲必要嘅規例,唔好將其他嘅重擔加俾你哋。
29 你哋唔好食祭過偶像嘅食物;唔好食血同勒死嘅牲畜;亦唔好有淫亂嘅行為。你哋能夠唔犯呢幾件事就好咯。願你哋平安!」
30 佢哋奉命起程到安提阿,聚集眾人,將信交俾佢哋。
31 佢哋宣讀信時,因信上鼓勵嘅話非常歡喜。
32 猶大同西拉亦係代上帝講話嘅先知;佢哋向兄弟講好多話,激勵佢哋,堅固佢哋嘅信心。
33 喺嗰處住咗一啲日子之後,兄弟就歡送佢哋,祝佢哋平安返去。
34 但係,西拉決定留喺嗰處。
35 保羅同巴拿巴暫時住喺安提阿;佢哋同其他好多人一齊教導並傳講主嘅道。
保羅同巴拿巴分手36 過無耐,保羅對巴拿巴話:「我哋可以返去以前傳佈主道嘅各村鎮,睇吓兄弟嘅情況。」
37 巴拿巴想帶稱為馬可嘅約翰一齊去,
38 但係保羅唔同意;因為馬可從前喺旁非利亞離開佢哋,唔共佢哋同來工作。
39 佢哋兩人為呢件事爭執,終於分手。巴拿巴帶馬可坐船去居比路,
40 保羅就選擇西拉同去,蒙兄弟將佢交託於主嘅恩典中。
41 佢去敘利亞同基利家,堅固各地教會。