使徒行傳 16
提摩太同保羅、西拉同工1 保羅嚟到特庇同路司得。喺路司得有一個信徒,名叫提摩太;佢嘅母親係信主嘅猶太人,父親係希臘人。
2 喺路司得同以哥念嘅兄弟都稱讚提摩太。
3 保羅想帶佢同行,替佢行割禮,因為呢一帶嘅猶太人都知佢嘅父親係希臘人。
4 佢哋經過嗰啲村鎮,將耶路撒冷使徒同長老所定下嘅規例交俾佢哋,吩咐佢哋遵守。
5 因此,各教會喺信心方面能夠堅固,人數亦日漸加多。
馬真頓嘅呼聲6 佢哋取道弗呂家同加拉太地區,聖靈唔准佢哋喺亞西亞省傳佈信息。
7 佢哋到每西亞邊界時,想入去庇推尼省,但係耶穌嘅靈禁止佢哋,
8 於是佢哋經過每西亞,去特羅亞。
9 當日晚上,保羅得一個異象,見一個馬其頓人,企喺處懇求佢話:「請你到馬其頓嚟幫助我哋!」
10 保羅得呢個異象,我哋立刻準備去馬其頓,因為我哋知上帝呼召我哋去傳福音俾當地嘅人。
呂底亞歸主11 我哋坐船從特羅亞出發,直往撒摩特喇,第二日到尼亞波利。
12 我哋向內地行,嚟到馬其頓第一區嘅首城腓立比;係羅馬嘅殖民區。我哋喺呢處住咗幾日。
13 安息日,我哋出城到河邊,心想,嗰處可能有猶太人禱告嘅地方。我哋坐低,向聚集喺處嘅婦女講道。
14 聽眾中有一個從推雅推喇城嚟嘅婦人,名叫呂底亞,佢係賣紫色布疋嘅。佢一向敬拜上帝;主開佢嘅心,使佢留心聽保羅講嘅話。
15 佢同佢一家人都受洗禮。隨後,佢請求我哋話:「若你哋認為我係真心信主嘅,請到我家住吓。」於是佢堅決將我哋留住。
喺腓立比獄中16 一日,我哋去禱告嘅地方,一個女奴向我哋行過嚟。佢係俾邪靈所迷,能占卜將來嘅事,替佢主人賺咗好多錢。
17 佢一路跟住保羅同我哋,大聲叫:「呢啲人係至高上帝嘅僕人,要對你哋宣佈得救之道!」
18 佢一連好幾日噉樣叫;保羅覺得好煩,就轉身,對嗰個邪靈話:「我奉耶穌基督嘅名,命令你從佢身上出去!」邪靈就即刻出去。
19 嗰個女奴嘅主人知道佢哋嘅財源從此斷絕,就捉住保羅同西拉,將佢哋拖到廣場見官,
20 帶佢哋到羅馬官長前,指控話:「呢啲係猶太人,竟嚟擾亂我哋嘅城。
21 佢哋提倡違法嘅規矩,係我哋羅馬人所不能接受、不能實行嘅!」
22 羣眾亦附和攻擊佢哋,官長就吩咐剝咗佢哋嘅衣服,鞭打佢哋。
23 打咗好多棍,就將佢哋鎖入監,並命令管監嘅人嚴密看管。
24 管監領令,將佢哋鎖喺內監,兩腳上木枷。
25 大約喺半夜,保羅同西拉喺處禱告、唱詩讚美上帝,其他囚犯都側耳聽。
26 忽然有劇烈地震,連監獄嘅地基都搖動;所有監門亦打開,囚犯嘅鎖鍊都鬆開。
27 管監醒過嚟,睇見監門開咗,以為所有囚犯都走咗,就拔刀,想自殺。
28 保羅一見,大聲叫話:「唔好傷害自己,我哋都喺呢處!」
29 管監叫人拎燈嚟,衝入去,戰戰競競俯伏喺保羅同西拉腳前。
30 又帶佢哋出嚟,問話:「兩位先生,我該做乜嘢致能得救呢?」
31 佢哋話:「當信主耶穌,你同你一家人就必得救。」
32 兩人又向佢同佢全家嘅人講解主嘅道。
33 嗰晚,就在嗰時,管監將佢哋帶去洗傷口;佢同佢全家人都即時受洗禮。
34 管監請保羅同西拉上自己嘅家,為佢哋設席。佢同全家充滿喜樂,因為佢哋信咗上帝。
35 第二日一早,羅馬嘅官長打發警官去話:「將嗰兩個人釋放!」
36 管監就對保羅話:「官長有令釋放你同西拉,你哋現今可以出獄,安心去。」
37 但,保羅對警官話:「我哋係羅馬公民,並未有定罪,佢哋當眾鞭打我哋,又將我哋鎖入監。現今佢哋想將我哋私下送走;係唔啱嘅!叫羅馬官長親自嚟帶我哋出去喇!」
38 警官將此話報告官長。佢哋一聽見保羅同西拉係羅馬公民,心裏害怕,
39 就到監獄向佢哋道歉,帶佢哋出嚟,請佢哋離開嗰個城。
40 保羅同西拉出咗監門,就去呂底亞嘅家,見到各兄弟,勤慰佢哋一番,然後離開。