使徒行傳 21
保羅上耶路撒冷1 我哋向佢哋告別後就開船。直航哥士島,第二日抵達羅底,從嗰處到帕大喇。
2 喺帕大喇遇着一隻要開去腓尼基嘅船,我哋就上船起航。
3 航行到望見居比路,就繞過南邊,朝着敘利亞行。我哋喺推羅上岸,因為船要喺呢處卸貨。
4 我哋喺呢處搵到一啲信徒,就同佢哋一齊住七日。佢哋得到聖靈嘅指示,勸保羅唔好去耶路撒冷。
5 但係,過咗逗留嘅時間,我哋就繼續旅程。信徒同佢哋嘅妻兒都送我哋到城外。眾人喺沙灘上跪下祈禱。
6 然後彼此道別。我哋上船,佢哋就回家。
7 我哋繼續航行,由推羅到多利買,向當地嘅兄弟問安,同佢哋住一日。
8 第二日我哋離開嗰處,到該撒利亞,入去傳福音嘅腓利家中,同佢一齊住。佢係喺耶路撒冷被選出嘅七位執事之一。
9 佢有四個未結婚嘅女,都有傳講上帝預言嘅恩賜。
10 我哋喺嗰處住咗幾日後,有個先知名叫亞迦布,由猶太省嚟。
11 佢嚟睇我哋,拎起保羅嘅腰帶,將自己嘅手腳綁起,話:「聖靈噉樣話:呢條腰帶嘅主人會喺耶路撒冷受猶太人噉樣捆綁,然後交俾異邦人。」
12 我哋一聽見呢啲話就同當地嘅人懇切勸保羅唔好去耶路撒冷。
13 但佢話:「你哋點解噉樣痛哭,使我心碎呢?我為主耶穌嘅緣故,不但喺耶路撒冷被捆綁,就係死喺嗰處亦係心甘情願嘅。」
14 我哋不能講服佢,就住口,只話:「願主嘅旨意成就。」
15 喺嗰處住咗幾日,我哋就收拾行李,上耶路撒冷。
16 有啲由該撒利亞嚟嘅信徒與我哋同行,將我哋帶到一個居比路人拿孫嘅家住;呢個人係早期嘅信徒。
保羅訪問雅各17 我哋到耶路撒冷,兄弟熱誠接待我哋。
18 第二日,保羅同我地一齊去見雅各;所有教會嘅長老亦在場。
19 保羅向佢哋問安,然後將上帝點樣使用佢喺異邦人中做嘅一切事向佢哋報告。
20 佢哋聽見都頌讚上帝,又對保羅話:「兄弟,情形係噉樣:喺猶太中有數以萬計嘅信徒,都係嚴守摩西律法嘅。
21 佢哋聽見你曾經教導僑居外邦嘅猶太人放棄摩西嘅律法,唔好替孩子行割禮,亦唔遵守猶太人嘅規矩.
22 佢哋必會聽到你到呢處嘅消息,我哋應該點樣做呢?
23 現今請你照我哋嘅話做!呢處有四個許咗願嘅人;
24 你帶佢哋去,同佢哋一齊去行潔淨禮,替佢哋繳費。噉樣,佢哋就可以剪去頭髮。你噉樣做,眾人就會知道,佢哋所聽聞關於你嘅事唔係事實,並且知道你自己亦係遵守摩西律法嘅。
25 至於異邦嘅信徒,我哋已經寫信吩咐佢哋唔好食任何祭過偶像嘅食物,唔好食血或勒死嘅牲畜,亦唔好有涯亂嘅行為。」
26 於是,保羅帶嗰啲人,喺第二日同佢哋一齊行潔淨禮。佢又到聖殿報告期屆滿嘅日子,等候祭司為佢哋每個人獻上祭物。
保羅喺聖殿裏被捕27 嗰七日嘅期間快要結束時,有啲由亞西亞省嚟嘅猶太人睇見保羅喺聖殿。就煽動羣眾,捉住保羅,
28 叫話:「以色列人呀,快嚟幫手!呢個人到處教訓人,反對以色人民同摩西嘅律法,亦反對聖殿,現今佢居然帶異邦人入聖殿,污辱神聖嘅地方!」
29 (佢哋噉樣講係因為睇見以弗所人特羅非摩同保羅一齊喺城裏,以為保羅曾經帶佢入聖殿。)
30 嗰時,全城騷動,羣眾跑過嚟,捉住保羅,將佢從聖殿裏拖出去,殿門即刻關埋。
31 暴民正想殺保羅時,有人向羅馬駐軍嘅指輝官報告,話全耶路撒冷喺暴動中。
32 指輝官連忙帶領軍隊同幾個軍官,趕到羣眾處。佢哋一見指揮官同軍隊,就停止毆打保羅。
33 指揮官上前捉住保羅,吩咐用兩條鐵鍊將佢鎖起。佢問:「呢個人係邊個?佢做咗乜嘢事呢?」
34 人羣中有啲叫呢樣,有啲叫嗰樣,亂成一團;指揮官無法查出真相,於是命令將保羅帶入營房。
35 保羅剛走上階級,因為羣眾非常兇暴,兵士只好將保羅抬起。
36 羣眾都跟喺後面,大叫:「除滅佢!」
保羅為自己辯護37 快要被帶入營房時,保羅對指揮官話:「我向你講一句話得唔得?」指輝官問:「你懂得希臘話咩!
38 你唔係以前作亂,率領四千暴徒逃去曠野嘅埃及人咩?」
39 保羅答話:「我係猶太人,出生喺基利家嘅大數,係一個著名城市嘅公民。請你准許我向羣眾講。」
40 指揮官准佢。於是保羅企喺階級上,向羣眾做手勢。眾人都靜落嚟,保羅就用希伯來語向佢哋講。