Library · yue

使徒行傳 20

保羅再訪問馬其頓同希臘

1 暴動平息後,保羅召集信徒,鼓勵佢哋,同時向佢哋告別。於是佢離開去馬其頓。

2 佢行經嗰一帶地區,對信徒講好多鼓勵嘅話,然後到希臘,

3 喺嗰處住三個月。保羅準備坐船去敘利亞時,發現猶太人陰謀要殺害佢,因此決定從馬其頓返去。

4 與佢同行嘅有庇哩亞人畢羅斯嘅仔所巴特,帖撒羅尼迦人亞里達古同西公都,特庇人該猶,重有提摩太同亞西亞人推基古及特羅非摩。

5 佢哋一班人先走,喺特羅亞等我哋。

6 過咗除酵節,我哋從腓立比開船,五日後到達特羅亞,同佢哋會合,喺嗰處住一星期。

保羅最後一次訪問特羅亞

7 星期六晚上,我哋一齊聚會,分享愛筵。保羅向眾人講道,因為佢第二日就要起行,所以一直講到半夜。

8 我哋聚會嘅樓上房間有好多燈火。

9 有個名叫猶推古嘅年輕人坐喺窗口,保羅繼續講話時,佢困倦瞓着,從三樓跌落嚟。眾人扶佢起身,發現佢已經死。

10 保羅落樓,伏喺佢身上,抱住佢,話:「你哋唔使慌,佢重有氣息!」

11 佢跟住又上樓,去擘餅來食。佢繼續談論好耐,到天光致離開。

12 佢哋將嗰個活嘅年輕人送回家,眾人都大受安慰。

從特羅亞到米利都

13 我哋先上船,開往亞朔,準備喺嗰處接保羅。呢啲係佢安排嘅,因為佢自己從陸路行。

14 佢喺亞朔同我哋相會,我哋接佢上船,然後向米推利尼出發。

15 我哋從嗰處再開船,第二日抵達基阿嘅對岸;再過一日,喺撒摩靠岸,第二日又到米利都。

16 保羅早已決定唔喺以弗所停留,免致喺亞西亞省耽擱時日。佢急忙前行想趕到耶路撒冷,希望能喺五旬節前抵達。

保羅臨別贈言

17 保羅由米利都打發人去請以弗所教會嘅長老嚟見佢。

18 佢哋嚟到,保羅對佢哋話:「你哋知道,自從我嚟到亞西亞省嘅第一日,我一直點樣同你哋相處,

19 喺謙卑同憂傷中事奉主,又由於猶太人嘅謀害而經歷好多磨煉。

20 你哋亦知,無論喺公共場合,或喺你哋個別嘅家中,喺我宣講同教導你哋時,凡係對你哋有益嘅,我都冇保留。

21 無論對猶太人或異邦人,我都勸告佢哋,要悔改,轉向上帝,信靠我哋嘅主耶穌。

22 現今,為順服聖靈,我要上耶路撒冷。我唔知道喺嗰處將遇到乜嘢事;

23 我只知,喺各城聖靈都指示我,有監獄同災難等住我。

24 但係,我並唔珍惜自己嘅性命,為要完成我嘅使命,成就主耶穌交俾我嘅工作,為上帝恩典嘅福音作證。

25 我喺各位中來往,傳上帝國嘅信息。現今我知,今後你哋都不能再見到我。

26 所以,我今日實在話你哋知,你哋中若有人沉淪,罪不在我;

27 因為我已經毫無保留將上帝嘅旨意傳俾你哋。

28 你哋自己要謹慎,亦要為聖靈所付託你哋照顧嘅全羣謹慎。牧養上帝嘅教會係佢藉自己個仔嘅血買嚟嘅。

29 我知我離開後,必有兇暴嘅豺狼混入你哋中嚟傷害羊羣。

30 喺你哋中間,亦有人會造謠講大話,誘惑信徒去跟從佢哋。

31 所以,你哋要警醒,要記得,喺三年嘅歲月裏,我點樣日夜用眼淚勸戒、教導你哋每個人。

32 現今我將你哋交託上帝同佢恩典嘅道。此道能建立你哋,使你哋同一切成聖嘅人,同得基業。

33 我從來冇貪圖任何人嘅金銀或衣服。

34 你哋都知我用我雙手工作嚟供給我及同工嘅需要。

35 我喺各種事上俾你哋留下榜樣,話俾你哋知應該點樣勤勞工作嚟幫助軟弱嘅人。要記得主耶穌親自講過嘅話:『施比受更為有福。』」

36 講完呢啲話,保羅就同佢哋全體跪下祈禱。

37 眾人痛哭,抱住佢親吻,同佢道別。

38 佢哋因為保羅話以後不能再見到佢呢句話特別傷心!佢哋就送佢上船。