Library · yue

使徒行傳 28

喺米利大島

1 我哋獲救上岸後致知嗰個島叫米利大。

2 島上嘅居民對我哋好友善。當時因落雨,天氣又冷,佢哋就生火,接待我哋。

3 保羅執起一把柴,放喺火中。有一條毒蛇受唔住熱,鑽出嚟,纏住佢嘅手。

4 島上嘅人睇見嗰條蛇掛喺保羅手上,就彼此話:「呢個人一定係殺人犯,雖然從海裏被救,天理仍唔容佢生存。」

5 但係保羅將嗰條蛇拂落火堆,自己冇受絲毫傷害。

6 眾人料佢嘅手必定腫起,或係突然仆倒死去;但等好耐,見佢冇事,就轉話:「佢係神呀!」

7 距離嗰個地方冇幾遠,酋長部百流有一塊田。佢歡迎我哋,誠意款待我哋三日。

8 當時,部百流嘅父親患熱病同痢疾,瞓喺床上。保羅到佢臥室,為佢禱告、按手,醫好佢。

9 此事之後,島上所有嘅病人都到嚟得醫好。

10 佢哋送好多禮物俾我哋;開船時,又將我哋途中所需要嘅嘢送到船上。

從米利大到羅馬

11 過咗三個月,我哋搭一隻從亞力山太嚟嘅船;呢隻船名叫「雙神號」,係停喺嗰個海島過冬嘅。

12 船到咗敘拉古,我哋喺嗰處停留三日,

13 然後再開船,到利基翁。第二日有南風,所以兩日內我哋就到部丟利,

14 喺嗰處遇見一啲兄弟;佢哋邀請我哋停留一個星期。就噉樣,我哋到羅馬。

15 羅馬嘅兄弟聽到我哋抵達嘅消息,就到亞比烏市同三館嚟迎接我哋。保羅一睇見佢哋就感謝上帝,更加壯膽。

保羅喺羅馬

16 我哋到羅馬之後,保羅得到准許,同看守佢嘅兵士住另外一處。

17 過咗三日,保羅約當地猶太人嘅領袖相見。佢哋嚟,保羅對佢哋話:「兄弟!我雖然冇做乜嘢冒犯同胞,或係違背祖宗規矩嘅事,我竟喺耶路撒冷被囚禁,又被解交羅馬當局。

18 佢哋審問我,見我冇該死嘅罪,有意釋放我。

19 但係猶太人反對,迫不得已,我只好上訴皇帝,唔係有乜嘢事想告我同胞。

20 為呢個緣故,我請你哋嚟見面講論。我帶住呢啲鎖鍊,係為以色列人所盼望嗰一位。」

21 佢哋對保羅話:「關於你嘅事,我哋並冇從猶太接到任何信件,亦冇兄弟從嗰處帶乜嘢消息嚟,或係講你乜嘢壞話。

22 但係,我哋想聽你嘅意見,因為我哋知道,你所屬嘅呢一門教派係到處受人攻擊嘅。」

23 於是,佢哋同保羅約定聚會嘅日子。嗰日到保羅住處嚟嘅人好多;從早到晚,佢向佢哋講解上帝國嘅信息。佢引證摩西律法同先知書,要佢哋信耶穌。

24 對於佢所講嘅話,有啲信,有啲唔信。

25 佢哋彼此不能同意,就散開。未散之前,保羅講一句話:「聖靈藉先知以賽亞向你哋嘅祖宗講過嘅話係冇錯嘅!

26 以賽亞話:『你去話俾呢啲人民知:你哋聽完又聽,但唔明白,睇完又睇,但睇唔見。

27 因為呢啲人民心智閉塞;佢哋塞住隻耳,閉埋隻眼。恐怕眼睇見,耳聽聞,心裏省悟,回心轉意,我就醫好佢哋。』」

28 於是保羅話:「所以,你哋應當知道,上帝拯救嘅信息已經傳俾異邦人。佢哋反而聽受!」

29 保羅講完呢啲話,嗰啲猶太人就走;彼此發生劇烈嘅爭辯。

30 保羅喺自己租嘅屋住足兩年。凡嚟訪問嘅人,佢都接待。

31 佢大膽傳上帝國嘅信息,教導有關主耶穌基督嘅事,冇受到乜嘢阻礙。