Library · yue

使徒行傳 7

司提反直言不諱

1 大祭司問司提反話:「的確有噉樣嘅事咩?」

2 司提反答話:「各位父老兄弟,請聽!當我哋嘅先祖亞伯拉罕住喺米所波大米,仍未移居哈蘭時,榮耀嘅上帝向佢顯現,

3 對佢話:『你要離開你嘅故鄉同親族,到我要指示你去嘅地方。』

4 於是亞伯拉罕離開迦勒底人嘅地方,去住喺哈蘭。佢父親死去以後,上帝將佢遷移到你哋現今住嘅地方。

5 當時上帝並冇俾亞伯拉罕乜嘢產業,連立足地都冇;但係上帝應許將呢塊土地俾佢,作為佢同佢後代嘅產業,雖然嗰時佢仍未有仔。

6 上帝對佢話:『你嘅後代要寄居外國,喺嗰處做奴隸,受虐待四百年。

7 但係,我要懲罰奴役佢哋嘅嗰一國。以後佢哋要離開嗰處,喺呢處敬拜我。』

8 於是上帝同亞伯拉罕立約,以割禮為記號。所以,亞伯拉罕喺以撒出生後第八日為佢行割禮;照樣以撒為雅各行割禮,雅各為十二祖先行割禮。

9 祖先嫉妒約瑟,將佢賣到埃及。但係上帝與佢同在,

10 救佢脫離一切嘅災難。當佢企喺埃及王法老面前時,上帝賜佢風度同智慧。法老立佢為國家嘅宰相同王室嘅總管。

11 冇幾耐,埃及同迦南全境有嚴重嘅饑荒,造成好大嘅災害;我哋嘅祖先絕糧。

12 雅各聽見埃及有食糧,便打發佢嘅仔,我哋嘅祖先,到嗰處係第一次。

13 第二次佢哋去時,約瑟同佢嘅兄弟相認;法老從此認識約瑟嘅家族。

14 約瑟派人去見佢父親雅各,請佢同全家去埃及;嚟嘅親族共有七十五人。

15 雅各南下到埃及;佢同其他嘅祖先死喺嗰處。

16 佢哋嘅遺體被送到示劍,葬喺亞伯拉罕用錢向哈抺嘅子孫買嚟嘅墳墓。

17 上帝向亞伯拉罕實行諾言嘅日子快到時,以色列族喺埃及嘅人口已經增加好多。

18 後來有一個完全唔認識約瑟嘅新王開始統治埃及。

19 呢個王用詭計剝削我哋嘅同胞,虐待我哋嘅祖先,強迫佢哋丟棄嬰兒,等佢哋不能生存。

20 嗰時摩西出生;長得非常可愛,在家中被撫養三個月,

21 到佢被丟棄時,法老嘅女收養佢,將佢當做自己嘅仔養大。

22 佢接受埃及人一切嘅學問,有好口才同辦事能力。

23 摩西四十歲時,決心要考察以色列同胞嘅情況。

24 有一次,佢睇見一個同胞受埃及人欺負,就上前保護佢,為佢伸冤,將埃及人殺死。

25 (佢以為同胞會明白上帝要用佢嚟拯救佢哋,但係佢哋唔明白。)

26 第二日,佢睇見兩個以色列人打鬥,想替佢哋調解,話:『你哋係同胞,點解彼此傷害呢?』

27 嗰個欺負同胞嘅將摩西推開,話:『邊個立你做領袖、做法官嚟管我哋呢?

28 唔通你想殺我,好似你昨日殺嗰個埃及人一樣咩?』

29 摩西一聽見呢啲話就逃離埃及,去寄居喺米田。喺嗰處,佢生咗兩個仔。

30 過四十年,喺西乃山嘅曠野,有一位天使從荆棘嘅火燄中向摩西顯現。

31 摩西見此景象非常驚奇,正在行前去睇時,佢聽見主嘅聲話:

32 『我係你祖先嘅上帝,亞伯拉罕、以撒、雅各嘅上帝。』摩西驚到震,唔敢睇。

33 主又對佢話:『解甩你嘅鞋!因為你企嘅地係聖地。

34 我嘅子民喺埃及受嘅苦難我都清楚睇見;我亦聽見佢哋嘅呻吟,我要拯救佢哋。你嚟!我要打發你去埃及。』

35 呢位摩西即係被以色列人拒絕、質問話『邊個立你做領袖、做法官嚟管我哋』嘅嗰個人。上帝藉喺荆棘中顯現嘅天使,打發佢做領袖、做拯救者。

36 佢帶領人民由埃及出嚟,喺埃及,紅海,同曠野嘅四十年間,行咗好多神蹟奇事。

37 摩西亦對以色列人民話:『上帝要從你哋嘅兄弟中為你哋興起一位先知,好似佢興起我一樣。』

38 佢喺曠野同以色列人民一齊;佢同我哋嘅祖先與及喺西乃山同佢講話嘅天使喺一齊;佢領受上帝永恆嘅信息,將信息傳俾我哋。

39 但係,我哋祖先唔聽從佢,亦唔理會佢,寧願再返去埃及。

40 佢哋對亞倫話;『請替我哋造啲神像,喺我哋前面帶路。我哋唔知道由埃及帶我哋出嚟嘅摩西遭遇到乜嘢事。』

41 於是佢哋造一個牛仔像,向佢獻祭,為自己手所造出嘅歡樂慶祝。

42 但係,上帝轉面唔睇佢哋,任從佢哋去拜天上嘅星辰,正如先知書所講:『以色列人民呀!喺曠野四十年間,你哋並冇為我獻上犧牲同祭物!

43 你哋抬住摩洛神嘅聖幕,又抬住理番神嘅星像,係你哋造嚟拜嘅偶像。因此,我要遷移你哋去巴比倫外!』

44 我哋嘅祖先喺曠野有象徵上帝臨在嘅聖幕,係上帝吩咐摩西依照佢所指示嘅模型造成嘅。

45 後來我哋嘅祖先繼承呢個聖幕;當上帝喺佢哋前頭趕走異邦人、佔據嗰片土地時,約書亞同佢哋將聖幕搬去嗰處,直到大衛嘅時代。

46 大衛蒙上帝喜悅,要求准許佢為上帝─就係雅各嘅上帝─建造一座殿宇;

47 後來為上帝建造殿宇嘅係所羅門。

48 其實,至高嘅上帝並唔住喺人建造嘅殿宇,如先知所講:

49 『主話:天係我嘅寶座;地係我嘅腳凳。你哋為我建造邊一種殿宇呢?邊處係我安息嘅地方呢?

50 呢啲一切豈唔係我親自造嘅咩?』

51 你哋呢啲頑固嘅人,你哋心胸閉塞,充耳不聞上帝嘅信息!你哋同你哋嘅祖先一樣,總係同聖靈作對!

52 邊一個先知冇受過你哋祖先嘅迫害呢?先知宣告嗰個公義嘅僕人要來臨,但你哋嘅祖先將佢哋殺死;現今你哋竟又出賣嗰個僕人,殺害佢。

53 你哋係接受上帝律法嘅人;呢啲律法係由天使傳落嚟嘅,但你哋唔遵守律法!

司提反殉道

54 議會嘅議員聽完司提反呢啲話,非常惱怒,向佢咬牙切齒。

55 司提反被聖靈充滿,舉目望天,睇見上帝嘅榮耀,又睇見耶穌企喺上帝嘅右邊,

56 就話:「我睇見天開,人子企喺上帝嘅右邊!」

57 佢哋就大聲叫,用手掩耳,一擁上前,捉住司提反,

58 將佢推出城外,用石掟佢。嗰啲證人將自己嘅外衣交俾一個名叫掃羅嘅青年看管。

59 司提反喺石紛紛襲擊下,向主呼求話:「主耶穌呀,求你接納我嘅靈魂!」

60 佢又跪落嚟,大聲叫話:「主呀,唔好將呢啲罪歸俾佢哋!」佢講完呢啲話就死。殺害司提反呢件