使徒行傳 6
七個助手1 嗰時,信徒嘅數目日日增加;講希臘話嘅猶太人同講希伯來土話嘅猶太人之間發生爭執。講希臘話嘅猶太人埋怨使徒喺分配每日生活費嘅事上疏忽咗佢哋中嘅寡婦。
2 因此,十二使徒召集全體信徒,對佢哋話:「我哋放下傳講上帝嘅道嘅工作,去管理膳食係唔應該嘅。
3 所以,兄弟呀,請從你哋中選出七個有名望、受聖靈充滿、又有智慧嘅人,等佢哋嚟負責呢啲事務。
4 我哋要專心於禱告同傳道嘅事。」
5 使徒嘅建議得到全體贊同。於是眾人推選司提反;佢係一個信心堅定、被聖靈充滿嘅人;又選出腓利、伯羅哥羅、尼迦挪、提門、巴米拿,同加入猶太教嘅安提阿人尼哥拉。
6 眾人請佢哋企喺使徒面前;使徒禱告後,就為佢哋行按手禮。
7 上帝嘅道繼續傳開;喺耶路撒冷嘅信徒數目增加好多,好多祭司亦接受此信仰。
司提反被捕8 司提反充滿上帝嘅恩賜同能力,喺民間行大奇事神蹟。
9 但有啲所謂『自由人』會堂嘅會員,從古利奈同亞力山太嚟嘅猶太人。同其他從基利家及亞西亞嚟嘅猶太人同司提反辯論。
10 聖靈賜智慧俾司提反,所以佢哋無法對抗佢講嘅話。
11 於是佢哋收買人出嚟誣告佢話:「我哋聽見此人講毀謗摩西同褻瀆上帝嘅話!」
12 佢哋用呢種方法煽動羣眾、長老,同經學教師。佢哋嚟,捉住司捉反,將佢帶到議會。
13 佢哋所收買嘅假證人出嚟話:「此人成日講反對我哋嘅聖殿同摩西律法嘅話。
14 我哋聽見佢話呢個拿撒勒人耶穌要拆毀聖殿,改變摩西傳俾我哋嘅一切傳統!」
15 所有坐喺議會嘅人都定眼睇住司提反,見佢嘅面貌好似天使嘅面貌一樣。