使徒行傳 9
掃羅信主1 掃羅繼續用兇殺嘅口氣恐嚇主嘅信徒。佢去見大祭司,
2 要求發俾大馬色各猶太會堂嘅文件,准許佢搜捕信奉主道嘅人,無論男女,都押解去耶路撒冷。
3 喺去大馬色路途中,快到城時,忽然有一道光從天落嚟,四面照住佢。
4 佢仆倒喺地,聽見有聲對佢話:「掃羅,掃羅!你點解迫害我?」
5 佢就問:「主呀,你係邊個?」嗰個聲回答話:「我係你迫害嘅耶穌。
6 起身入城,有人會將你所當做嘅事話俾你知。」
7 同掃羅行嘅人都企住,講唔出話;佢哋聽見聲,但睇唔見人。
8 掃羅從地起身,睜開眼,乜嘢都睇唔見。同行嘅人拉住佢嘅手,帶佢入大馬色城。
9 佢三日乜嘢都睇唔見;亦冇飲冇食。
10 喺大馬色有一個信徒,名叫亞拿尼亞。佢得一個異象;喺異象中主叫佢:「亞拿尼亞!」佢答話:「主呀,我喺處。」
11 主話:「你立刻去直街,喺猶大家搵一個大數人,名叫掃羅。佢正喺處禱告,
12 喺異象中睇見一人,名叫亞拿尼亞,入嚟為佢按手,使佢睇得見。」
13 亞拿尼亞答話:「主呀,好多人話我知,此人點樣喺耶路撒冷殘酷迫害你嘅聖徒。
14 現今佢到大馬色,帶住祭司長俾佢嘅權,要拘捕所有敬拜你嘅人。」
15 主對佢話:「你只管去!因為我選用佢嚟事奉我,要佢喺異邦人、君王,同以色列人中傳揚我嘅名。
16 我要親自指示佢,佢必要為我嘅名遭受好多苦難。」
17 於是亞拿尼亞去。佢入嗰間屋,按手喺掃羅身上,話:「掃羅兄弟,喺你到呢處嚟嘅路上向你顯現嘅主耶穌親自打發我嚟,使你再睇得見,並且被聖靈充滿。」
18 即時,掃羅對眼好似有魚鱗跌落噉樣,佢就睇得見。於是起身,接受洗禮;
19 食過嘢後,體力就恢復。
掃羅喺大馬色傳道20 掃羅喺大馬色同信徒一齊住咗好幾日。佢馬上到各會堂宣講耶穌,話:「佢就係上帝之子。」
21 所有聽見嘅人都好驚奇,話:「此人豈唔係喺耶路撒冷殘害敬拜耶穌嗰個人咩?佢嚟呢處,唔係要拘捕佢哋、將佢哋押交俾祭司長咩?」
22 但係,掃羅嘅傳道反而更有力量;佢用堅強嘅論據證明耶穌係基督,使大馬色嘅猶太人不能反駁。
23 過咗好多日,猶太人陰謀要將掃羅殺死。
24 有人將佢哋嘅企圖話俾掃羅知。為要殺掃羅,佢哋日夜喺城門守候。
25 但係,喺晚上,佢嘅門徒用大籃將佢由城牆上吊落去。
掃羅喺耶路撒冷26 掃羅到咗耶路撒冷,想同門徒來往。但係,佢哋唔信佢係門徒;眾人都怕佢,
27 只有巴拿巴嚟協助佢,帶佢去見使徒,向佢哋解釋掃羅點樣喺路上遇見主,主點樣向佢講話。及掃羅點樣勇敢喺大馬色奉耶穌嘅名傳道。
28 於是掃羅同使徒來往,喺耶路撒冷奉主嘅名大膽傳道。
29 佢亦同講希臘話嘅猶太人講解,辯論,但佢哋想殺佢。
30 兄弟知道呢件事,就帶佢到該撒利亞,送佢去大數。
31 當時,猶大、加利利、撒馬利亞各地嘅教會有一段平安嘅時期。教會喺敬畏主,聖靈扶助下建立起嚟,人數日日增加。
彼得喺呂大同約帕32 彼得走遍各地;亦訪問住喺呂大嘅聖徒。
33 喺嗰處,佢遇見一個人,名叫以尼雅;患癱瘓症,喺床上瞓咗八年。
34 彼得對佢話:「以尼雅,耶穌基督醫好你。起身,收拾床鋪喇!」以尼雅立刻起身。
35 凡住喺呂大同沙崙嘅人睇見佢,就信主。
36 喺約帕有個女信徒名叫大比大(希臘文嘅名係多加,意思係羚羊)。佢做咗好多好事,樂意幫助貧窮人。
37 佢因病死咗。有人將佢嘅屍體洗淨,放喺樓上一間房裏。
38 約帕離呂大唔遠,喺約帕嘅門徒聽見彼得喺呂大,就打發兩個人去見佢,要求佢話:「請你快啲到我哋呢處。」
39 彼得立刻起程,同佢哋一齊去。彼得一到,有人帶佢到樓上嘅房。所有嘅寡婦圍住彼得哭,又將多加生前縫製嘅衣服俾佢睇。
40 彼得吩咐眾人出去,就跪低禱告,然後轉向死者,話:「大比大,起身!」佢睜開眼,睇見彼得,就坐起身。
41 彼得伸手扶佢起身,又叫眾聖徒同寡婦入去,將活嘅多加交俾佢哋。
42 此消息傳遍約帕,有好多人信主。
43 彼得喺約帕一個皮革匠西門嘅家住咗好多日。好多人信主。