使徒行傳 10
彼得傳福音俾哥尼流1 喺該撒利亞有個人,名叫哥尼流,係羅馬軍「意大利營」嘅軍官。
2 佢係一個敬虔嘅人;佢同佢全家都敬畏上帝,多行施捨,又時常熱心向上帝禱告。
3 有一日下午,三點鐘左右,佢得一個異象;喺異象中清楚睇見上帝嘅一個使者入嚟,叫佢:「哥尼流!」
4 佢定眼睇住天使,非常驚惶,就話:「主呀,乜嘢事?」天使話:「上帝已經聽你嘅禱告,亦睇見你做賙濟嘅善事。
5 現今你要打發人到約帕,邀請嗰個名叫彼得嘅西門嚟。
6 佢喺一個皮匠西門家中作客;西門家喺海邊。」
7 對佢講話嘅天使離去後,哥尼流叫兩個僕人同平常伺候佢嘅一個敬虔嘅侍衛嚟,
8 將此事話佢哋知,然後打發佢哋去約帕。
9 第二日,佢哋行路將近約帕。約中午時,彼得上屋頂禱告。
10 佢肚餓,想食。嗰家嘅人正在預備午飯時,佢得一個異象,
11 睇見天開,有一件器皿降落,好似一塊大布,布嘅四角綁住,吊落地上,
12 裏面有地上嘅各種飛禽走獸,又有爬蟲。
13 有聲對佢話:「彼得,起身,劏嚟食喇!」
14 彼得話:「主呀,唔好!我從來冇食過任何凡俗不潔嘅嘢。」
15 嗰個聲第二次對佢話:「上帝認為潔淨嘅,你唔可以當做污穢。」
16 噉樣一連三次,嗰件器皿就被收回上天。
17 彼得正喺處猜疑,唔知道睇見嘅異象係乜嘢意思;嗰時,哥尼流打發嚟嘅人已經搵到西門嘅家,企喺門外,
18 高聲問:「有冇一位名叫彼得嘅西門客人住喺呢處?」
19 彼得仍在思想異象嘅意思時,聖靈對佢話:「有三個人嚟搵你!
20 你落去,同佢哋一齊去,唔好疑惑,因為係我打發佢哋嚟嘅。」
21 於是彼得落去,對嗰啲人話:「我就係你哋搵嘅人。你哋嚟係為乜嘢呢?」
22 佢哋答話:「我哋嘅長官哥尼流打發我哋嚟嘅;佢係一位敬畏上帝嘅義人,一向受全體猶太人民嘅尊敬。有一位聖天使指示佢,要佢嚟請你到佢家,領受你嘅教導。」
23 彼得就請佢哋入去,招待佢哋喺嗰處過夜。第二日,彼得起程同佢哋一齊去;由約帕嚟嘅幾位兄弟亦共佢同行。
24 再過一日,佢哋到該撒利亞。哥尼流已經邀請佢嘅親朋好友喺家中迎候。
25 彼得剛到,哥尼流上前,俯伏喺佢腳前拜佢。
26 彼得連忙扶起佢,話:「請起身,我不過係人。」
27 彼得一邊同哥尼流講,一邊走入屋。佢睇見裏面有好多人聚集,
28 就對佢哋話:「你哋都知道,按照我哋嘅規矩,猶太人係唔准同異邦人密切來往嘅;但係上帝已經指示我,唔好將任何人當做唔潔淨或凡俗嘅。
29 所以,當你哋打發人嚟邀請我,我冇推辭就嚟。現今請問,你哋請我嚟有乜嘢目的?」
30 哥尼流話:「四日前,大約下午三點鐘,我喺家中禱告。忽然有個穿着光亮衣服嘅人企喺我面前,
31 話:『哥尼流!上帝垂聽你嘅禱告,亦記念你做賙濟嘅善事。
32 你要打發人到約帕,邀請名叫彼得嘅西門嚟。佢喺皮匠西門嘅家作客;西門嘅家喺海邊。』
33 因此,我立刻打發人去請你;你肯光臨,真係好咯。現今我哋喺上帝面前,想聽主吩咐你講嘅一切話。」
彼得講道34 彼得開口話:「我確實知道,上帝對所有嘅人都平等看待。
35 凡敬畏佢,行為正直嘅人,無論屬邊一種族,佢都喜歡。
36 佢藉萬有嘅主耶穌基督傳俾以色列人嘅信息係和平嘅福音。
37 約翰宣傳洗禮以後,從加利利開始傳遍猶太全境嘅大事你哋都知道。
38 你哋亦知道拿撒勒人耶穌;上帝點樣以聖靈同能力賜俾佢,使佢行遍各地,廣行善事,醫好一切受魔鬼控制嘅人,因為上帝與佢同在。
39 我哋係佢喺耶路撒冷同其他猶太人嘅地方所做一切事嘅見證人。佢哋將佢掛在木上殺死。
40 第三日,上帝使佢復生,而且向人顯現;
41 唔係顯現俾眾人睇,只係顯現俾我哋被上帝揀選嚟作證嘅人睇。佢從死者中復生之後,我哋曾同佢一齊飲食。
42 佢命令我哋將福音傳俾眾人,證明佢係上帝所立、做活人同死人嘅審判者。
43 眾先知亦為佢作證話,凡信佢嘅,可以因佢嘅名得蒙赦罪。」
異邦人接受聖靈44 彼得講緊話時,聖靈降臨喺所有領受信息嘅人身上。
45 嗰啲同彼得從約帕嚟嘅猶太信徒,睇見上帝將聖靈嘅恩賜亦施俾異邦人,就好驚奇;
46 因為佢哋聽見呢啲人講方言,稱讚上帝為大。於是彼得話:
47 「呢啲人已經領受聖靈,同我哋一樣,邊個能阻止佢哋領受水嘅洗禮呢?」
48 因此,佢吩咐佢哋奉耶穌基督嘅名受洗禮。佢哋又求彼得同佢哋一齊多住幾日。