羅馬書 1
1 我係基督耶穌嘅僕人保羅;上帝選召我做使徒,特派我傳佢嘅福音。
2 福音係上帝喺好耐以前透過佢嘅先知喺聖經上所應許嘅,內容有關佢子—我哋嘅主耶穌基督。
3 從身世嚟講,佢係大衛嘅後代;
4 從聖潔嘅神性講,因上帝使佢從死者中復生,以大能顯示佢係上帝之子。
5 由佢,我得到特別恩賜,為佢嘅名做使徒,帶領各國嘅人嚟信從佢。
6 呢啲當然包括你哋喺羅馬、蒙上帝選召歸耶穌基督嘅人。
7 我問候所有喺羅馬、上帝所愛,奉召為聖徒嘅。願我哋嘅父上帝同主耶穌基督賜恩典平安俾你哋。
多謝嘅禱告8 首先,藉耶穌基督,我為你哋眾人多謝我嘅上帝,因為你哋嘅信心已經傳遍天下。
9 上帝知道我不停在禱告中想念你哋。我全心全意事奉佢,傳揚有關佢子嘅福音;佢可以證明我講嘅係真。
10 我懇求上帝,按照佢美好嘅意思為我開路,等我終於有機會去訪問你哋。
11 我好希望見到你哋,同你哋分享屬靈嘅恩賜,使你哋嘅靈性堅強起來。
12 或者我應該講,由於你我彼此嘅信心,我哋可以互相獲得鼓勵。
13 兄弟呀,我要你哋知道,有好幾次我計劃訪問你哋,但係總有一啲事阻住,不能成行。我嘅目的係要喺你哋中領人歸主,好似喺其他異邦人中一樣。
14 因為無論對乜人,開化嘅,冇開化嘅,有學問嘅,冇學問嘅,我都欠佢哋嘅債。
15 所以,我迫切要將福音亦傳俾你哋喺羅馬嘅人。
福音嘅大能16 我不以福音為恥;此福音係上帝嘅大能,要拯救一切信嘅人,先係猶太人,然後異邦人。
17 因為此福音啟示上帝點樣使人稱義:係由信心開始,用信心結束。好似聖經所講:「因信稱義嘅人必得到真生命」。
人類嘅罪過18 人嘅不虔不義蒙蔽住真理,上帝就由天上啟示佢嘅義憤。
19 上帝懲罰佢哋;因為關於佢嘅事,人可以知道嘅,已經清清楚楚擺喺佢哋眼前,係上帝親自向佢咃顯明嘅。
20 上帝睇唔見嘅特性,就係佢永恒嘅大能同神性,其實從創世以來都睇得見,憑佢所造嘅萬物辨認出。所以人無可推諉。
21 佢哋雖然知道上帝,但唔將榮耀歸俾佢,亦唔多謝佢;佢哋嘅思想荒唐,心智暗昧。
22 佢哋自以為聰明,其實係愚蠢。
23 佢哋唔敬拜永生嘅上帝,反去拜偶像,即係嗰啲仿照必死嘅人、飛禽、走獸、昆蟲形狀所製造出嚟嘅。
24 所以,上帝任憑佢哋隨着心裏嘅慾念做下流嘅事,糟蹋自己嘅身體。
25 佢哋放棄上帝嘅真理,寧願接受虛謊;佢哋敬奉被造之物,而唔敬奉造物之主—佢係永遠應該受讚美嘅,阿們!
26 因此,上帝任憑佢哋放縱自己嘅情慾;唔單只女人顛倒性嘅正當用處,而去違反自然嘅性行為,
27 男人亦放棄同女人正當嘅性關係,發生同性戀,做出羞恥嘅事,結果遭受呢種敗行所應得嘅懲罰。
28 既然人認為唔使承認上帝,上帝就任從佢哋存住敗壞嘅心,做唔應該做嘅事。
29 佢哋充滿各樣不義、邪惡、貪心、毒行;亦充滿嫉妒、兇殺、爭鬥、詭詐,同陰謀。佢哋造謠,
30 彼此詆毀。佢哋憎恨上帝,互相侮辱,傲慢,自誇,惹是生非,唔孝順父母,
31 喪盡天良,言而無信,冇愛心,冇同情心。
32 佢哋知道,按照上帝嘅命令,所有做呢種事嘅人係應該死;但佢哋唔單只自己噉樣做,亦贊成人哋噉樣做。