羅馬書 2
上帝嘅審判1 朋友呀,你批評他人,無論你係邊個,都係唔可以原諒嘅。你批評他人,但自己所做嘅同佢哋一樣,你就係定自己嘅罪咯。
2 我哋知道,上帝審判做呢種事嘅人係冇錯嘅。
3 你批評他人嘅事正係你所做嘅!你以為能逃避上帝嘅審判咩?
4 抑或係你輕視佢嘅仁慈、寬容,同忍耐?你應該知道上帝嘅仁慈,係想引你悔改!
5 但你嘅心頑固剛硬,為自己招嚟更多嘅忿怒,以致喺上帝嘅義憤同公義嘅審判嚟到之日受更重嘅刑罰。
6 因為上帝必照每人嘅行為報應佢。
7 恆心行善,追求由上帝嚟嘅尊貴、榮耀,同唔朽壞嘅生命嘅人,上帝將永生賜俾佢哋。
8 嗰啲自私,拒絕真理,隨從不義嘅人,上帝嘅義憤同懲罰就臨到佢地。
9 所有作惡嘅人將來必會受患難同痛苦,先係猶太人,後是異邦人。
10 所有行善嘅人,佢要賜俾佢哋尊貴、榮耀,同平安,先係猶太人,後是異邦人。
11 因為上帝係唔偏待人嘅。
12 異邦人冇摩西嘅律法,佢哋犯罪就唔受律法嘅制裁;猶太人有律法,佢哋犯罪就照律法受審判。
13 (因為上帝判為無罪嘅,唔係單聽律法嘅人,係實行律法嘅人。
14 異邦人冇律法;但係當佢哋本住天性做合乎律法嘅事,佢哋就係自己嘅律法,雖然佢哋並冇律法。
15 佢哋嘅行為顯明律法嘅命令係寫喺佢哋心裏。佢哋嘅良知亦證明呢啲係啱;因為佢哋嘅思想有時譴責自己,有時為自己辦護。)
16 所以,按照我傳嘅福音,上帝喺末日要藉基督耶穌,對人心中嘅隱祕,實行審判。
猶太人同律法17 你自稱係猶太人,倚靠律法,又誇口你同上帝有特殊關係。
18 你已經受律法嘅教訓,知道上帝要你做乜嘢,能辨別是非。
19 你自以為係盲人嘅嚮導,係黑暗中嘅亮光,
20 係無知人嘅指導,年輕人嘅老師。又認為,因為你有摩西嘅律法,你就掌握知識同真理。
21 你教導他人,而唔教導自己咩?你教人唔好偷竊,而自己偷嘢咩?
22 你話唔好姦淫,而自己姦淫咩?你憎惡偶像,而自己偷寺廟裏嘅嘢咩?
23 你誇口你有上帝嘅律法,而自己破壞上帝嘅律法嚟羞辱佢咩?
24 聖經話:「為你哋猶太人嘅緣故,上帝嘅名受到異邦人嘅侮辱」。
25 你若係守律法,你嘅割禮就有價值;你違反律法,你嘅割禮就一啲作用都冇。
26 所以嗰啲冇受割禮嘅人若遵守律法嘅命令,上帝豈唔將佢當作係受過割禮嘅咩?
27 你哋猶太人要被異邦人定罪;因為你哋雖然擁有律法經典,亦受咗割禮,但係你哋破壞咗律法。佢哋雖然身體上冇受割禮,但係遵守律法。
28 邊個致算係真猶太人,真受割禮嘅人呢?並唔係喺外表上做猶太人、接受過身體上嘅割禮嘅。
29 真猶太人係由內心開始嘅;換句話講,佢心裏受咗割禮,係上帝嘅靈嘅工作,而唔係在乎律法經典。噉樣嘅人所受嘅稱讚唔係由人嚟嘅,而係由上帝嚟嘅。