羅馬書 10
1 兄弟呀!我甚盼望我嘅同胞能得救,為此事我不停向上帝懇求!
2 我可以證明佢哋對上帝確實好熱心,但佢哋嘅熱心唔係以真知識做基礎。
3 佢哋唔明白上帝嘅義,想立自己嘅義,冇順服上帝嘅義。
4 其實,基督已經結束律法嘅功效,使一切信佢嘅人成為義人。
普遍嘅拯救5 關於因遵守律法能成為義人嘅事,摩西曾經噉樣寫:「遵守律法命令嘅人,就因此得生」。
6 但因信成為義人嘅事,就噉樣話:「你唔好自問:邊個要到天上去呢?(亦即係話,邊個要去帶基督落嚟呢?)
7 亦唔好問:「邊個要到陰間去呢?」(亦即係話,邊個要將基督從死者中帶上嚟呢?)
8 呢啲話嘅意思係:「上帝嘅信息離你唔遠,喺你口,喺你心。」換句話講,係喺我哋所宣講嘅信息裏。
9 若你口宣認耶穌為主,心信上帝使佢從死者中復生,你就必得救。
10 因為我哋心噉樣信,就能成為義人;口噉樣宣忍,就必得救。
11 聖經話:「信佢嘅人不至失望。」
12 呢啲話係指所有嘅人講嘅,因為冇猶太人同異邦人嘅分別;上帝係萬人嘅主,佢要豐豐富富賜福俾所有呼求佢嘅人。
13 「凡呼求主名嘅人就必得救。」
14 但佢哋冇信佢,點能呼求佢呢?冇聽聞,點能信呢?冇人傳講,點能聽聞呢?
15 冇受打發,點能傳講呢?好似聖經所講:「傳福音嘅人,佢哋嘅腳蹤何等美善呢!」
16 但唔係每個人都接受福音。以賽亞曾經講過:「主呀!邊個相信我哋所傳嘅信息呢?」
17 可見信係由聽而嚟,聽係由傳揚基督而嚟。
18 但係我要問:佢哋真係冇聽過信息咩?當然聽過。好似聖經所講:「佢哋嘅聲音已傳遍人間;佢哋嘅言語已傳到傳到天涯。」
19 我要再問:以色列人真係唔知道咩?首先,摩西用上帝嘅話答呢個問題:「我要用未成國嘅民族引起你哋嘅嫉妒,用愚昧嘅人民嚟激動你哋嘅怒氣。」
20 以賽亞更大膽講過:「我俾冇搵我嘅人搵到,向冇求問我嘅人顯現。」
21 但關於以色列人,佢話:「我成日伸出手,要嗰啲悖逆剛愎嘅人民同我言歸於好。」