Library · yue

羅馬書 11

上帝對以色列人嘅慈愛

1 我問:上帝棄絕咗佢嘅子民咩?當然唔係!我自己亦係以色列人,亞伯拉罕嘅後代,屬於便雅憫支派嘅。

2 上帝冇棄絕佢從遠古揀選嘅子民。你哋豈唔知,聖經記載:當以利亞向上帝控告以色列人時,

3 佢話:「主呀,佢哋殺咗你嘅先知,拆咗你嘅祭壇;只剩下我一人,佢哋想殺我。」

4 上帝點樣答佢呢?佢話:「我為自己留下七千人,佢哋都冇跪拜過巴力嘅。」

5 現今嘅情形亦係一樣:上帝出於自己嘅恩典所揀選嘅人淨係剩低少數。

6 上帝嘅揀選係出於恩典,唔係根據人嘅行為;假如係根據人嘅行為,所謂恩典就唔係真嘅恩典。

7 結果點樣呢?係以色列人得唔到佢哋所尋求嘅,只有上帝揀選嘅少數人致搵到;其餘嘅人對上帝嘅呼召唔肯聽。

8 好似聖經所講:「上帝使佢哋嘅心靈麻木;直到現今,佢哋嘅眼不能睇見,耳不能聽聞。」

9 大衛亦講過:「願佢哋喺宴會上陷入圈套,被捉住;遭受懲罰!

10 願佢哋嘅眼昏暗,不能睇見;願佢哋常時彎低佢哋嘅腰!」

11 我問:猶太人失足跌倒,就完全毀滅咗咩?當然唔係!因為佢哋嘅過犯,拯救就去到異邦人處,使猶太人嫉妒發憤起嚟。

12 猶太人嘅過犯俾世界帶嚟豐富嘅福;佢哋靈性上嘅貧乏反而使異邦人富足。噉樣,若猶太人全體都包括喺上帝嘅拯救裏面,豈唔帶嚟更豐富嘅福咩?

上帝拯救異邦人

13 現今我向你哋異邦人講:既然我係異邦人嘅使徒,我當然睇重我嘅任務。

14 或者我亦可以激發同胞嫉妒發憤嘅心,由此拯救佢哋中間嘅一啲人。

15 若佢哋被遺棄反而使世人成為上帝嘅朋友,就佢哋被接納時,豈唔係從死復生咩?

16 所獻嘅新麵若係聖潔,就全團都係聖潔。樹根若係聖潔,就樹枝都係聖潔。

17 有啲橄欖樹嘅樹枝被折落嚟,而野橄欖樹嘅樹枝被駁上去。你哋異邦人就好似野橄欖樹,現今分享猶太人豐富嘅生命。

18 所以,你哋唔好睇輕嗰啲好似樹枝被折落嚟嘅人。你哋不過係樹枝,點可以自誇呢?唔係你哋支持樹根,而係樹根支持你哋!

19 你若話:「樹枝被折落,為使我得駁上去。」

20 冇錯。佢哋被折落,因為佢哋唔信;你哋能企立,因為你哋信。但你哋唔好驕傲,要存住警戒嘅心。

21 猶太人係原有嘅樹枝;上帝既然冇愛惜佢哋,你哋以為佢會愛惜你哋咩?

22 可見,上帝嘅仁慈共嚴厲。對於失足跌倒嘅人,佢係嚴厲;對於你哋,佢係仁慈,只要你哋繼續生活喺佢嘅慈愛裏;否則,你哋亦會被折落嚟。

23 至於猶太人,若佢哋唔係長久不信,就可以被恢復到原來嘅地位上,因為上帝能將佢哋再駁上去。

24 你哋異邦人好比被折落嚟嘅野橄欖樹枝,用唔自然嘅方法被駁喺好橄欖樹上。猶太人就好似經過培植嘅樹;上帝將由呢樖樹折落嚟嘅枝再駁喺原來嘅樹上,唔係更容易咩?

上帝嘅慈愛普及萬民

25 兄弟呀!有一個奧祕嘅真理,我希望你哋知道,免致你哋自以為聰明。呢個真理係:以色列人嘅頑固唔係永遠嘅,只要等到異邦人歸向上帝嘅數目滿咗。

26 跟住,以色列人全家都要得救。好似聖經所寫:「必有一位救主從錫安出嚟;除去雅各家一切嘅罪惡。」

27 「我要赦免佢哋嘅罪時,上帝話:呢啲就係我同佢哋所立嘅約。」

28 猶太人拒絕福音,成為上帝嘅敵人,結果使你哋異邦人得益。但係,由於上帝嘅選擇,又根據上帝對眾族長嘅應許,猶太人仍然係上帝嘅朋友。

29 因為上帝嘅選召同恩典係從來唔改變嘅。

30 以前你哋異邦人唔順從上帝;現今因猶太人嘅不順服,你哋反而得到上帝嘅矜恤。

31 同樣,因為你哋得矜恤,猶太人現今唔順服,等佢哋由於你哋得矜恤而得到上帝嘅矜恤。

32 上帝使全人類被困喺不順服中,係想對佢地顯示佢嘅矜恤。

頌讚上帝

33 上帝豐富嘅恩典智慧同知識真係深奧!邊個能解釋佢嘅決斷呢?邊個能探測佢嘅道路呢?

34 好似聖經所話:「邊個知道主嘅心意?邊個能幫佢出主意呢?

35 邊個先俾過佢,使佢後來償還呢?」

36 因為萬物嘅存在係本於佢,由於佢,歸於佢。願榮耀歸於上帝,直到永遠!阿們。