Library · yue

羅馬書 13

對政府嘅責任

1 人人都應該服從國家嘅權力機構,因為權力嘅存在係上帝所准許嘅;執政者嘅權力係由上帝而嚟。

2 所以,抗拒執政者就係抗拒上帝嘅命令;噉樣嘅人難免受審判。

3 統治者唔係要使行善嘅人懼怕,係要使作惡嘅人懼怕。你要唔怕執政者,就要行善,佢就會嘉許你;

4 因為佢係上帝使用嘅人,佢嘅工作係對你有益嘅。若你作惡,你就要怕佢,因為佢嘅懲罰並非兒戲。佢係上帝使用嘅人,要執行上帝對作惡嘅人嘅懲罰。

5 所以,你哋必要服從執政者,唔係單為怕上帝嘅懲罰,亦係為自己良心嘅平安。

6 你哋納稅,亦係為同樣嘅理由,因為執政者喺執行任務時係為上帝工作。

7 所以,要向佢哋繳納所應納嘅稅:應貢獻嘅,要貢獻;應繳納嘅,要繳納;應懼怕嘅,要懼怕;應尊敬嘅,要尊敬。

對其他人嘅責任

8 千萬唔好欠人嘅債!只有彼此相愛係你哋應欠嘅債。愛人嘅,就係遵守律法。

9 律法嘅命令規定:「唔好姦淫;唔好殺人;唔好偷嘢;唔好貪心。」呢一切及其他嘅命令都包括喺:「愛人如己」呢一條命令裏。

10 一個愛人嘅人,唔會做出傷害人嘅事。所以,愛就成全咗全部嘅律法。

11 你哋必要噉樣做,因為你哋知道現今係乜嘢時候;係你哋應瞓醒嘅時候。現今我哋比初信時更接近上帝嘅拯救。

12 黑夜快要過去,白晝就要嚟到。我哋唔好再做暗昧嘅事;要拎起武器,準備喺白晝作戰。

13 我哋行事為人要光明正大,好似生活喺白晝嘅人一樣。唔好縱慾醉酒,唔好邪淫放蕩,唔好紛爭嫉妒。

14 總要用主耶穌基督嘅武器裝備自己;唔好只顧滿足肉體嘅情慾!