羅馬書 12
事奉上帝嘅生活1 所以,弟兄呀,既然上帝噉樣憐恤我哋,我勸你哋將自己當做生活嘅祭物獻俾上帝,專心事奉佢,得到佢嘅喜歡。呢啲係你哋應該獻上真實嘅敬拜。
2 唔好效法世界,要等上帝完全改變你哋嘅心思意念,你哋就會明白上帝嘅旨意,知道乜嘢係良善、完全,佢所喜歡嘅。
3 藉上帝俾我嘅恩賜,我要對你哋各位講:唔好將自己睇得太高,要謙卑自守,各人按照上帝所賜俾佢嘅信心嚟衡量自己。
4 一個身體係由好多肢體構成嘅,而每一肢體有佢唔同嘅功用。
5 同樣,雖然我哋有好多人,但係我哋喺基督裏成為一體,互相聯絡,構成身體唔同嘅部份。
6 所以,我哋要好好噉運用上帝俾我哋唔同嘅恩賜,做應做嘅事。若上帝俾我哋嘅恩賜係傳講信息,就應照住信心嘅程度傳講;
7 服務嘅,就應服務;教導嘅,就應教導;
8 勸勉嘅,就應勸勉;施與嘅,就應慷慨;做領袖嘅,就應唔怕辛勞;憐憫人嘅,就應樂意。
9 愛人要真誠。要厭棄邪惡,持守良善。
10 要用手足之愛相親相愛;要竭誠互相敬重。
11 唔好懶惰,要努力工作,以火熱嘅心事奉主。
12 喺盼望中要常存喜樂,喺患難中要忍耐,禱告要恆切。
13 要同貧窮嘅聖徒分享你所有嘅;要接待異鄉人。
14 要祝福迫害你嘅人;總要祝福,唔好咒詛。
15 要同喜樂嘅人同喜樂,同哭泣嘅人同哭泣。
16 無論對乜嘢人,都要同心彼此關懷。唔好心驕氣傲,反要謙卑自處;亦唔好自以為聰明。
17 唔好以惡報惡;眾人認為美好嘅事,要踴躍去做。
18 要盡你嘅全力同眾人和睦相處。
19 唔好為自己復仇,寧可等上帝嘅忿怒替你伸冤,因為聖經話:「主話:伸冤在我;我必報應。」
20 聖經又話:「你嘅仇敵若肚餓,就俾佢食,口渴,就俾佢飲;你噉樣做會使佢越發覺得慚愧。」
21 所以,唔好被惡所勝,要用善勝惡。