羅馬書 15
唔求滿足自己1 我哋有堅強信心嘅人應該幫助信心軟弱嘅人,分擔佢哋嘅重擔,唔係求滿足自己。
2 我哋每人要為兄弟嘅益處着想,嚟建立共同嘅信心生活。
3 因為基督並唔求滿足自己,好似聖經所寫:「辱罵你嘅人發出嘅辱罵都落喺我身上。」
4 聖經裏嘅話都係為教導我哋而寫嘅,目的係要我哋能由聖經所教導嘅忍耐同鼓勵獲得希望。
5 願賜忍耐同鼓勵嘅上帝幫助你哋有同樣嘅見解,學習基督耶穌嘅榜樣,
6 使眾人一齊,同聲頌讚我哋主耶穌基督嘅父上帝。
向異邦人傳福音7 所以,為榮耀上帝,你哋要彼此接納,如同基督接納你哋一樣。
8 我話你哋知,基督為要顯明上帝嘅信實,做咗猶太人嘅僕人,為要使上帝對眾族長嘅應許能實現,
9 同時使異邦人亦能讚美上帝嘅矜恤。好似聖經所寫:「為噉,我要喺異邦人中頌揚你;我要歌頌你嘅名。」
10 聖經又話:「異邦人呀!要同上帝嘅子民一齊歡樂。」
11 再話:「所有嘅異邦人呀!要頌讚主;萬民呀!你哋要頌讚佢。」
12 以賽亞亦話:「有耶西嘅後代出嚟,佢要興起統治異邦;異邦人都要仰望佢!」
13 願上帝,即係希望嘅泉源,因你哋對佢嘅信心,使你哋充滿各樣喜樂、平安,亦使你哋嘅希望,藉聖靈嘅能力,不斷增加。
保羅直言無諱14 兄弟呀!我自己的確知道你哋滿有良善嘅品德,亦具備豐富嘅知識,能彼此勸導。
15 但喺呢封信裏,對於某啲問題,我仍然大膽提醒你哋。我直言無諱,係因為上帝俾我特權,
16 使我成為基督耶穌嘅僕人,喺異邦人中工作。我好似祭司一樣宣講上帝嘅福音,使異邦人成為聖靈所獻上嘅祭物,係上帝所悅納嘅。
17 噉樣,因為我喺基督耶穌裏,我可以因事奉上帝而覺得光榮。
18 我所要大膽講嘅就呢一句話:基督藉我嘅言語行為,又用神蹟奇事同上帝靈嘅能力使異邦人順服上帝。
19 因此,我從耶路撒冷一直到以利哩古一帶地方,到處傳講基督嘅福音。
20 我一向嘅願望係喺重未有聽見基督嘅地方傳福音,免致我嘅工作建立喺他人嘅基礎上。
21 聖經講過:「未曾認識佢嘅人要睇見;冇聽過佢嘅人要領悟。」
保羅計劃訪問羅馬22 我多次遇到阻礙,不能去你哋處。
23 但現今,既然我已經完成喺呢一帶嘅工作,而且多年嚟一直想去訪問你哋,
24 我希望現今就去,喺我去西班牙嘅路上,順便去睇你哋,喺你哋處歡聚一段時間,然後等你哋幫忙使我成行。
25 但為咗接濟聖徒嘅事,我現今一定要上耶路撒冷。
26 因為馬其頓同亞該亞嘅教會樂意捐出一筆錢,嚟幫助耶路撒冷窮苦嘅聖徒。
27 呢啲固然係佢哋樂意做嘅,事實上亦係佢哋嘅義務。既然佢哋俾異邦人分享屬靈嘅恩賜,異邦人亦應該喺物質上幫助佢哋。
28 等我辦完呢件事,將佢哋所募捐嘅錢都交付清楚以後,我就要從你哋嗰處,去西班牙。
29 我知道,我去探望你哋時亦要將基督豐富嘅恩典帶俾你哋。
30 兄弟呀!藉我哋嘅主耶穌基督,及聖靈所賜嘅愛心,我請求你哋同我一齊懇切祈求上帝,
31 使我唔使受到喺猶太唔信嘅人嘅危害,又使我喺耶路撒冷辦理嘅救濟工作得到聖徒嘅滿意。
32 上帝若准許,我就可以高高興興去睇你哋,喺你哋中同得安息。
33 願賜平安嘅上帝與你哋各位同在!阿們。