羅馬書 16
保羅問候信徒1 我向你哋介紹我哋嘅姊妹非比;佢係堅革哩教會嘅女執事。
2 請你哋依照聖徒嘅本份好好接待佢。無論佢有乜嘢需要,請你哋幫助佢。佢曾熱心幫助好多人,我自己亦得過佢嘅幫助。
3 請問候事奉基督耶穌嘅同工百基拉同亞居拉;
4 佢哋為我冒生命嘅危險。唔單只我多謝佢哋,異邦嘅各教會亦都多謝佢哋。
5 亦請問候喺佢哋家中嘅教會。請問候我親愛嘅朋友以拜尼士;佢係亞西亞省第一個歸信基督嘅人。
6 亦向為你哋辛勞工作嘅馬利亞致意。
7 請問候曾同我一齊坐監嘅猶太人同胞安多尼古同猶尼亞。佢哋喺使徒中頗有名望,亦係比我先信基督嘅。
8 請問候主內親愛嘅朋友暗伯利;
9 亦問候事奉基督嘅同工耳巴奴同我親愛嘅朋友士大古。
10 請問候經歷過考驗、對基督始終忠心嘅亞比利;亦問候亞利多布一家人。
11 請問候猶太同胞希羅天;亦問候拿其數一家信主嘅兄弟。
12 請問候主內嘅同工土非拿氏同土富撒氏;亦問候為主勤勞工作嘅親愛朋友彼息氏。
13 請問候魯孚;佢係主內一位傑出嘅工人;亦問候佢嘅母親—佢一向待我好似自己嘅仔一樣。
14 請問候亞遜其土、弗勒干、黑米、八羅巴、黑馬,同其他同佢哋喺一齊嘅兄弟。
15 請問候非羅羅古同猶利亞,尼利亞同佢嘅姊妹,阿林巴與及同佢哋喺一齊嘅聖徒。
16 你哋要用聖潔嘅親吻互相問安。基督嘅各教會都向你哋問安。
最後嘅勸導17 兄弟呀!我勸你哋,要防備嗰啲製造分裂、動搖他人嘅信心、背棄你哋所受嘅教導嘅人;要遠離佢哋。
18 因為噉樣嘅人唔係事奉我哋嘅主基督,而係滿足自己嘅肚腹。佢哋用花言巧語迷惑老實人嘅心。
19 眾人都知道你哋對福音嘅信從,所以我非常為你哋高興。我要你哋喺好事上聰明,喺壞事上無知。
20 賜平安嘅上帝快速摧毀撒但,使佢屈服喺你哋腳下。願我哋嘅主耶穌基督賜恩典俾你哋!
21 我嘅同工提摩太,及猶太同胞路求、耶孫、所西把德,都問候你哋。
22 代我寫呢封信嘅德丟,亦喺主內問候你哋。
23 嗰位接待我、又俾教會喺佢家中聚集嘅該猶問候你哋。
24 本城司庫以拉都同我哋兄弟括土亦問候你哋。
結束嘅禱告同頌讚25 願榮耀歸俾上帝!佢能照我所傳嘅福音堅定你哋嘅信心。此福音係關於耶穌基督嘅信息,啟示自古以來隱藏嘅奧秘。
26 此奧秘已經透過眾先知書顯明出嚟,並且按照永生上帝嘅命令昭示萬國,使萬民信服。
27 願榮耀透過耶穌基督歸俾獨一全智嘅上帝,直到永遠!阿們。