哥林多前書 1
1 我保羅;由於上帝嘅旨意,蒙召做基督耶穌嘅使徒。同所提尼兄弟
2 寫信俾哥林多上帝敎會。就係喺各地呼求我哋主耶穌基督之名嘅人,同樣係喺基督耶穌裏蒙召做聖徒而歸上帝嘅。基督係佢哋嘅主,亦係我哋嘅主。
3 願我哋嘅父上帝同主耶穌基督賜恩典,平安俾你哋。
喺基督裏嘅福4 我成日為你哋多謝我嘅上帝,因為佢透過基督耶穌賜恩典俾你哋,
5 使你哋喺基督裏凡事富足,具備充分嘅知識同口才。
6 有關基督嘅見證已經堅立喺你哋中,
7 以致你哋喺等候我哋嘅主耶穌基督顯現時,冇缺少任何一樣恩賜。
8 主必由頭到尾幫助你哋,使你哋喺我哋嘅主耶穌基督降臨之日無可指責。
9 上帝係信實可靠嘅;佢呼召你哋,使你哋同佢嘅仔-我哋嘅主耶穌基督有團契。
敎會嘅分裂10 兄弟呀,我奉我哋主耶穌基督嘅名勸你哋,言論要一致,唔好分裂,要團結,有一致嘅想法,有共同嘅目標。
11 我嘅兄弟呀,有革來氏家嘅人坦白話我知,你哋中有紛爭。
12 我嘅意思係,你哋意見分岐。有人話:「我係保羅嘅人」;有人話:「我係亞波羅嘅人」;有人話:「我係屬彼得嘅」;有人話:「我係屬基督嘅。」
13 基督竟被分割咗!唔通替你哋死喺十字架上嘅係保羅咩?你哋係奉保羅嘅名受洗嘅咩?
14 多謝上帝,除咗基利司布同該猶,我並冇替你哋任何人施洗,
15 所以冇人能話,你哋係奉我嘅名受洗嘅。
16 (我亦同司提反一家嘅人施洗過,除此之外,重同邊個施洗過,我都記唔清楚。)
17 基督派我唔係為施洗,係為傳福音,唔係用智慧嘅言論,免致基督喺十字架上嘅死失咗效力。
基督係上帝嘅大能同智慧18 基督死喺十字架上嘅信息,喺嗰啲走向滅亡嘅人睇嚟係愚拙嘅;對我哋得救嘅人嚟講,就係上帝嘅大能。
19 好似聖經話:「我將摧毁聰明人嘅智慧;廢除博學者嘅學問。」
20 噉樣,聰明人喺邊處呢?博學者喺邊處呢?世上嘅辯士喺邊處呢?上帝豈唔係令呢個世界嘅智慧成為愚拙咩!
21 上帝運用佢嘅智慧,使世人不能靠自己嘅智慧去認識佢;反轉,上帝決定透過我哋所傳嗰個「愚拙」嘅信息嚟拯救信佢嘅人。
22 猶太人求神蹟,希利尼人尋智慧,
23 但我哋傳被釘十字架嘅基督。此信息猶太人睇嚟係侮辱,異邦人睇嚟係荒唐。
24 但係喺蒙上帝選召嘅人眼中,唔論係猶太人或異邦人,此信息就係基督;係上帝嘅大能,上帝嘅智慧。
25 因為所謂「上帝嘅愚拙」總勝過人嘅智慧,「上帝嘅軟弱」亦勝過人嘅堅強。
26 兄弟呀,要記得上帝呼召你哋時,你哋係處喺邊一種景況裏。從人嘅觀點睇,你哋好少係聰明嘅,有能力嘅,或係有高尚社會地位嘅。
27 上帝偏要揀選世人所認為愚拙嘅,嚟使聰明人羞愧,又揀選世人所認為軟弱嘅,嚟使堅強嘅人羞愧。
28 佢亦揀選世人所輕視、厭惡、認為唔重要嘅,嚟廢壞一向被認為重要嘅,
29 使人喺上帝面前無可誇口。
30 但係,上帝使你哋能同基督耶穌聯合,又使佢成為我哋嘅智慧;透過佢,我哋能同上帝和好,成為上帝聖潔嘅子民,並且得到自由。
31 好似聖經話:「誇口嘅就應該誇耀主嘅作為。」