Library · yue

哥林多前書 2

基督十字架嘅信息

1 兄弟呀,我從前去你哋處,並冇用乜嘢華麗嘅詞句或高深嘅學問對你哋宣講上帝嘅奧祕。

2 因為我立定主意,當我在你哋中間時,除耶穌基督同佢死喺十字架上嘅事之外,乜嘢都唔提。

3 為噉,我去你哋處時,又軟弱又害怕,戰戰兢兢。

4 我所講嘅道,所傳嘅福音,都唔用智慧婉轉嘅言語,係倚靠聖靈嘅大能嚟證實真理,

5 使你哋嘅信仰唔根據人嘅智慧,係以上帝嘅大能做基礎。

上帝嘅智慧

6 但係,對嗰啲靈性成熟嘅人,我亦講智慧;唔係講屬世界嘅智慧,亦唔講嗰啲好快就敗壞世界統治者嘅智慧。

7 我所講嘅智慧係上帝奧祕嘅智慧,係向人隱藏、但喺創世之前已經預定使我哋得榮耀嘅智慧。

8 世上嘅統治者冇一個識此智慧,若識,佢哋就唔會將榮耀嘅主釘喺十字架上。

9 好似聖經所話:「上帝為愛佢嘅人所預備嘅,係眼未見過,耳未聽過,亦從來冇人想到嘅!」

10 但係,上帝透過佢嘅靈將佢嘅奧祕啟示我哋。聖靈細察萬事,連上帝深藏嘅旨意亦能細察。

11 至於人,只有佢自己裏面嘅靈致知道關於佢一切嘅事。同樣,只有上帝嘅靈致知道上帝一切嘅事。

12 我哋冇領受此世界嘅靈,而係領受上帝打發嚟嘅聖靈,使我哋能知道上帝俾我哋嘅一切恩賜。

13 所以,我哋講嘅道唔係用人嘅智慧敎導嘅言論嚟講,而係用聖靈所敎導嘅言語,向屬聖靈嘅人講解屬靈嘅真理。

14 嗰啲冇上帝靈嘅人不能領受上帝嘅靈所俾嘅恩賜。噉樣嘅人不能明白此事,認為呢啲係荒唐嘅,因為此事嘅價值必須用屬靈眼光致能領悟。

15 屬聖靈嘅人能判斷萬事,但係冇人能評斷佢。

16 好似聖經所話:「邊個知道主嘅心?邊個能替佢出主意?」但係,我哋屬聖靈嘅人係有基督嘅心嘅。