Library · yue

哥林多前書 16

捐助信徒

1 關於籌款幫助聖徒嘅事,你哋可以照我以前吩咐加拉太各敎會嘅辦法去做。

2 每星期日,各人應當按自己嘅收入撥出一啲錢,積存起嚟,唔需要等我嚟嗰時致捐。

3 等我到嚟時,就派你哋信任嘅人,同我嘅介紹信,將你哋嘅捐款帶去耶路撒冷。

4 若需要我親自去,佢哋可以同我一齊去。

保羅嘅計劃

5 我現今正要路過馬其頓。訪問馬其頓之後,就去你哋處。

6 我可能喺你哋處住吓,或者喺處過冬,然後繼續我嘅旅程。噉樣,我無論去邊處都得你哋送行。

7 我唔願意只喺路過時訪問你哋;主若准許,我希望同你哋住耐啲。

8 但係,我重要留喺以弗所,一直到五旬節;

9 因為,雖然有好多反對嘅人,呢處嘅門大開,有好多工作嘅機會。

10 若提摩太到你哋處,我希望你哋好好噉接待佢,使佢安心,因為佢同我一樣係為主工作嘅。

11 邊個都唔好睇輕佢;要送佢平安前行,返到我處,因為我正等佢同一班兄弟一齊嚟。

12 至於亞波羅兄弟,我屢次鼓勵佢同其他兄弟一齊去訪問你哋,但佢總覺得現今去唔適宜,等有機會,佢必會去。

最後嘅話

13 你哋要警醒,要喺信仰上企穩,要做大丈夫,要剛強。

14 一切工作都要憑愛心去做。

15 兄弟呀,我有話勸你哋。你哋識得司提反同佢一家人;佢哋係亞該亞初結之果,並且喺服事聖徒嘅事上非常熱心。

16 你哋要聽從噉樣嘅人,及同佢哋一齊辛勞工作嘅人。

17 司提反、福徒拿都,同亞該古能到呢處,我好高興。佢哋正補償你哋唔喺呢處嘅遺憾。

18 佢哋使我覺得快慰,好似使你哋快慰一樣。噉樣嘅人係值得你哋敬重嘅。

19 亞西亞省嘅各敎會都向你哋問安;亞居拉同百基拉,同喺佢哋家中嘅敎會,喺主裏熱切向你哋問安。

20 呢處嘅兄弟都向你哋問安。你哋要用聖潔嘅親吻彼此問安。

21 我親手寫:「保羅祝你哋好!」

22 若有唔愛主嘅人,佢係當受咒詛嘅。主呀,我願你嚟!

23 願主耶穌賜恩典俾你哋!

24 喺基督耶穌裏,我深愛你哋眾人!阿們。