Library · yue

哥林多前書 15

基督嘅復生

1 兄弟呀,我要你哋記住我以前傳俾你哋嘅福音;此福音你哋領受咗,並且用佢做信心嘅基礎。

2 若你哋持守此福音,唔係徒然相信,就必會因此福音得救。

3 我曾將我所領受最重要嘅信息傳俾你哋,係:按照聖經所講,基督為我哋嘅罪死咗;

4 又按照聖經所講,被埋葬,喺第三日復生。

5 佢向彼得顯現,又向十二使徒顯現。

6 以後佢又一次向五百多個跟從佢嘅人顯現;呢啲人多數重生存,雖然亦有啲已經死。

7 後來,佢向雅各顯現,又向所有嘅使徒顯現。

8 最後,佢亦向我顯現;我好似係一個喺唔適當時候出生嘅人。

9 我喺使徒中原本係最微小嘅,我唔配稱為使徒,因為我迫害過上帝嘅敎會。

10 但係,由於上帝嘅恩典,我致成為今日嘅我,佢所賜俾我嘅恩典冇落空。反轉嚟講,我比其他所有嘅使徒更加辛勞工作;其實,唔係我自己喺處工作,係上帝嘅恩典同我一齊工作。

11 無論係我抑或係眾使徒,我哋噉樣傳;你哋亦噉樣信。

論信徒嘅復生

12 既然我哋所傳嘅信息係基督已經從死裏復生,點解你哋中有人話冇死人復生嘅事呢?

13 若冇復生嘅事,即係等於話,基督冇復生;

14 若基督冇從死裏復生,我哋就冇乜嘢好傳,你哋亦冇乜嘢好信。

15 噉樣,我哋顯然係為上帝做假見證;因為我哋見證,講佢使基督從死裏復生。若真冇死人復生嘅事,上帝就冇使基督復生。

16 若死人冇復生,即係等於話,基督冇復生。

17 若基督冇復生,你哋嘅信仰就係幻想,你哋仍然迷失喺罪裏。

18 噉樣講,死咗嘅基督徒亦係滅亡咯。

19 若我哋信基督嘅人只喺今生有希望,我哋就比世界上任何人更可憐。

20 但係,事實上基督已經從死裏復生;呢啲係保證已經死嘅人亦要復生。

21 因為死亡係由一人嚟嘅,死人嘅復生亦係由一人嚟嘅。

22 同樣,眾人嘅死亡係因為佢哋同亞當連結,眾人嘅復生係因為佢哋同基督連結。

23 不過,每人要照適當嘅次序復生:最先係基督,其次係,佢再嚟嗰陣,屬於佢嘅人。

24 然後末期致到;嗰時,基督要消滅一切嘅執政者、掌權者,同有能者,將國交俾父上帝。

25 因為基督必要統治,直到上帝打敗一切仇敵,使佢哋都屈服喺佢腳下。

26 佢要毁滅最後嘅仇敵就係死亡。

27 因為聖經話:「上帝使萬物都屈服喺佢腳下」。好明顯,呢處所講嘅「萬物」並唔包括上帝本身,因為佢係使萬物屈服喺基督腳下嘅。

28 到萬物屈服喺基督嗰陣,子本身亦要屈服喺嗰位使萬物都順服佢嘅上帝,等上帝喺萬物之上統御一切。

29 若唔係噉樣,嗰啲為死人受洗禮嘅又有乜嘢意思呢?佢哋希望嘅係乜嘢呢?若係死人冇復生,佢哋又點解重要為死人受洗呢?

30 我哋又何必時時冒險呢?

31 兄弟呀,我日日面對住死!我敢講,係因為我哋同喺主基督耶穌嘅生命裏,我以你哋為榮。

32 若我喺以弗所同野獸搏鬥純粹係出於人嘅動機,呢啲對我有乜嘢益呢?若死人冇復生:「我哋不如飲飲食食,因為明日就要死咯。」

33 唔好受愚弄。「壞嘅朋友會敗壞品德!」

34 要醒悟,唔好再犯罪。我講呢啲係要你哋覺得羞愧,因為你哋中有人唔認識上帝。

35 有人問:「死人點能復生呢?佢哋會有乜嘢樣嘅形體呢?」

36 無知嘅人呀!你種喺地裏嘅種,若唔死就不能發芽生長。

37 你哋所種嘅係麥,或其他嘅種,都係一粒,並唔係將來要長成嘅形體。

38 上帝照自己嘅意思俾種一個形體;佢使各樣嘅種各有適當嘅形體。

39 各種動物嘅肉體亦唔相同:人有人體,獸有獸體;鳥有鳥體,魚有魚體。

40 有天上嘅形體,亦有地上嘅形體;天上嘅形體有一種美,地上嘅形體有另一種美。

41 日有日嘅光輝,月有月嘅光輝,星有星嘅光輝;甚至呢粒星同嗰粒星所發嘅光唔一樣。

42 死人復生亦係噉樣。身體埋葬咗會朽壞;復生後係唔朽壞嘅。

43 被埋葬嘅係醜陋衰弱嘅;復生嘅係完美健壯嘅。

44 被埋葬嘅係血肉嘅身體;復生嘅係屬靈嘅身體。既然有血肉嘅身體,亦有屬靈嘅身體。

45 因為聖經話:「頭一個人亞當被造成為有生命嘅人」;但係末後嘅亞當係賜生命嘅靈。

46 在先嘅唔係屬靈嘅;係血肉嘅,然後致有屬靈嘅。

47 頭一個亞當係由地上塵土造成嘅;第二個亞當係由天上嚟嘅。

48 屬塵土嘅人係同由塵土造成嘅人一樣;屬天嘅人係同從天上嚟嘅人一樣。

49 我哋既有屬塵土嘅人嘅形狀,將來亦必有從天上嚟嘅人嘅形狀。

50 兄弟呀,我話你哋知:血肉嘅身體不能承受上帝嘅國,會朽壞嘅不能承受唔會朽壞嘅。

51 你哋要注意此奧祕嘅事:我哋並唔係都要死,

52 但在一息間,轉吓眼,最後嘅號角響時,都要變化。最後號角一響,死人要復生而成為唔朽壞嘅,我哋亦要變化。

53 因為會朽壞嘅將變成唔朽壞嘅,會死嘅將變成唔會死嘅。

54 到嗰啲會朽壞嘅已經變成唔朽壞嘅,嗰啲會死嘅已經變成唔會死嘅,聖經上嘅話就實現:「死亡被消滅;勝利已經達成!」

55 死亡呀!你嘅勝利喺邊處?死亡呀!你嘅毒剌喺邊處?

56 死亡嘅毒剌係由罪而嚟,而罪嘅權勢係由律法而嚟。

57 但係,多謝上帝,佢使我哋由我哋嘅主耶穌基督得勝!

58 所以,親愛嘅兄弟,你哋要企穩,唔好動搖。要不辭勞苦為主工作;因為你哋知道,為主工作絕唔會係徒然嘅。