哥林多後書 1
1 我係保羅;奉上帝旨意做基督耶穌嘅使徒。我同我哋嘅兄弟提摩太寫信俾喺哥林多上帝嘅敎會同全亞該亞所有嘅聖徒。
2 願我哋嘅父上帝同主耶穌基督賜恩典、平安俾你哋。
保羅感謝上帝3 我哋要感謝我哋嘅主耶穌基督嘅父上帝!佢係慈愛嘅天父,亦係一切安慰嘅來源。
4 喺一切患難中,佢安慰我哋,使我哋能用佢賜俾我哋嘅安慰,去安慰遭遇一切患難嘅人。
5 我哋同基督同受好多苦難,亦由於基督得到好多安慰。
6 我哋遭遇苦難,係為使你哋得到安慰,得到拯救;我哋得安慰,你哋亦同樣得安慰,並且得力量嚟忍受我哋所遭受嘅苦難。
7 我哋對你哋嘅信心從不動搖;我哋知道,你哋分擔我哋嘅苦難,亦分享我哋所得嘅安慰。
8 兄弟呀,我哋希望你哋知道,以前喺亞西亞我哋所遭遇嘅患難,被壓太重,力不能勝,連生存嘅希望都冇。
9 我哋覺得已經被判死刑。噉樣嘅情形使我哋知道不能靠自己,只倚靠嗰位使死人復生嘅上帝。
10 佢曾從死亡嘅危險中拯救我哋,將來重要拯救;只要你哋用禱告幫助我哋,我哋確信呢位上帝將來重要施行拯救。
11 有好多人為我哋禱告,等我哋蒙恩,亦必定有好多人為我哋感謝上帝。
保羅改變計劃12 我哋所誇耀嘅係:我哋嘅良知證明我哋在世為人,尤其是我哋同你哋嘅關係,都受上帝所賜嘅坦率同誠懇支配,呢啲係由於上帝恩典嘅力量,唔係由於屬世嘅智慧。
13 我哋寫俾你哋嘅,只限於你哋所能讀、所能領會嘅。你哋現今領會嘅只係一部份,我希望你哋以後會完全明白。
14 噉樣,喺我哋嘅主耶穌再嚟嘅日子,你哋會誇耀我哋,好似我哋誇耀你哋一樣。
15 既然有噉嘅確信,我就計劃先去訪問你哋,使你哋獲得雙倍嘅快樂。
16 我去馬其頓時,計劃先經過你哋處,返嚟時再去一次,等你哋幫助我去猶太。
17 噉嘅計劃,有邊個能批評我係輕率呢?唔通我計劃此事係出於自私嘅動機,是是非非,反覆無常咩?
18 我指住信實嘅上帝話,我嘅諾言並唔係「是」而又「非」嘅。
19 因為西拉、提摩太,同我傳俾你哋嘅上帝之子耶穌基督並唔係一位是而又非嘅。反轉嚟講,佢就係上帝嘅「是」。
20 上帝一切嘅應許都喺基督身上成為「是」。為噉,我哋透過佢講「阿們」,嚟榮耀上帝。
21 上帝向你我保證,我哋生活喺基督裏;佢將我哋分別出嚟,
22 喺我哋身上蓋上佢嘅印記,並且賜聖靈喺我哋心中,作為佢為我哋預備嘅一切嘅保證。
23 我祈求上帝為我作證;若我講大話,佢會懲罰我!我決定唔去哥林多係為你哋着想。
24 我哋唔係命令你哋應該信乜嘢,因為你哋喺信仰上已經企穩。我哋好願意同你哋同工合作,等你哋有喜樂。