Library · yue

哥林多後書 13

警告同問候

1 現在係我第三次要嚟訪問你哋。聖經講過:「任何控告都一定要兩個或三個證人致能成立。」

2 對嗰啲以前犯過罪嘅,同其餘嘅人,我喺第二次訪問你哋時已經警告過,現今我唔喺你哋處,再次警告你哋,下一次我去時,我必唔寬容佢哋。

3 你哋需要憑據證明基督託我講話。基督對付你哋時並唔係軟弱;係喺你哋中顯出能力。

4 雖然佢喺軟弱中被釘死喺十字架上,但靠上帝嘅能力佢仍然生活。我哋同佢連結,亦成為軟弱,但係為你哋嘅益處,我哋亦靠上帝嘅能力同佢一齊生活。

5 你哋要考驗自己,省察自己,睇吓你哋係唔係過住信心嘅生活。你哋若經得起考驗,就應該知道耶穌基督喺你哋嘅生命中。

6 我希望你哋知道,我哋並唔係經唔起考驗嘅。

7 我哋祈求上帝,使你哋唔做任何壞事;呢啲唔係要表彰我哋嘅成功,而係要你哋有端正嘅行為,即使我哋被當係失敗嘅。

8 我哋絕對不能做任何敵對真理嘅事,只能維護真理。

9 我哋軟弱而你哋剛強,係我哋應該高興嘅。我哋所祈求嘅,係你哋做完全嘅人。

10 所以我不在你哋處時寫呢封信,等我同你哋見面時,唔使用主俾我嘅職權嚴厲對待你哋。主俾我嘅職權係為造就你哋,唔係為敗壞你哋。

11 最後,兄弟呀。願你哋努力做完全嘅人。接受我嘅勸告;彼此同心,和睦相處。願慈愛同賜平安嘅上帝與你哋同在!

12 你哋要用聖潔嘅親吻彼此問安!

13 眾聖徒都向你哋問安!

14 願主耶穌基督嘅恩典,上帝嘅慈愛、聖靈嘅團契,與你哋每一位同在!