哥林多後書 12
保羅見異象同啟示1 雖然自誇冇好處,但係我必要誇一誇口。現今我要講一講主賜俾我嘅異象同啟示。
2 我知道有一位基督徒,佢喺十四年前被提到天上嘅高層(我唔知道係佢嘅身體上去,抑或係佢得異象,只有上帝知道。)
3 我再講,此人被提到樂園(係佢嘅身體上去,抑或係佢得異象,我亦唔知道,只有上帝知道)。
4 喺嗰處,佢聽見不能用言語表達、亦不能用口描述嘅事。
5 我要為此人誇口;但係除咗有關我軟弱嘅事,我唔為自己誇口。
6 其實,我自誇亦唔算係愚蠢,因為我講嘅係真話。但係我唔自誇,因為我唔願意有人將我捧得太高,超過佢喺我身上所睇到或聽到嘅。
7 為咗使我不至於因得到好多奇特嘅啟示而驕傲,有一種病痛好似刺糾纏喺我身上,好似撒但嘅使者刺痛我,使我唔敢驕傲。
8 為此事,我曾三次祈求主將呢條刺攞走,
9 但佢答我話:「你只要有我嘅恩典就夠咯;因為我嘅能力喺你軟弱時顯得最剛強。」為噉我特別喜歡誇耀我嘅軟弱,使我覺得基督嘅能力保護住我。
10 為基督嘅緣故,我樂意忍受軟弱、侮慢、困苦、艱難、同迫害;因為我幾時軟弱,我就幾時強壯呀。
保羅關心哥林多敎會11 我竟好似一個蠢材,係你哋逼我噉樣嘅。本來你哋應該讚許我。雖然我算唔得乜嘢,我亦冇唔及嗰啲「超等使徒」嘅地方。
12 喺你哋中,我用各樣嘅忍耐,又透過奇事、異能,同神蹟向你哋證明我使徒嘅身分。
13 除咗我未曾拖累過你哋嘅呢一件事,你哋所受嘅待遇有邊一樣唔及其他敎會呢?呢啲係唔公道嘅,請原諒我。
14 現今我準備第三次訪問你哋,我對你哋冇乜嘢要求。我要嘅係你哋,唔係你哋嘅金錢。本來年幼嘅仔女唔需要供養父母,父母反而應該供給年幼嘅仔女。
15 為幫助你哋,我願意支付我一切所有,甚至我本身。唔通我越愛你哋就越少得你哋嘅愛咩?
16 你哋要承認,我未曾成為你哋嘅拖累;但係重有人話我用謊言詭詐控制你哋。
17 我利用過打發到你哋處嘅人佔你哋便宜咩?
18 我鼓勵提多去訪問你哋,又打發其他兄弟同去。提多佔過你哋便宜咩?佢同我所做嘅豈唔係出自同樣嘅動機咩?我哋嘅步伐豈唔係一致嘅咩?
19 或者,你哋以為我哋一向都係替自己辯護,其實唔係;喺上帝面前我哋只講基督要我哋講嘅話。朋友呀!我哋所做嘅一切無非是想造就你哋。
20 我怕當我去時,睇見你哋唔符合我所期望嘅,而你哋睇見,我亦唔符合你哋所期望。我亦怕睇見紛爭、嫉妒、發脾氣、自私、毁謗、流言、傲慢,同騷擾。
21 我又怕下次去時,我嘅上帝要使我喺你哋面前蒙羞,而我難免會為好多以前犯罪,淫亂,放蕩,到現今重冇悔改嘅人悲傷哭泣。