哥林多後書 5
1 我哋知道,若我哋所住喺地上嘅帳幕被拆去,上帝會俾我哋天上嘅房屋,係佢親自建造,永遠存在嘅。
2 我哋現今歎息,切望住入去天上嘅房屋,好似着上衣服;
3 着上,就不至於赤身露體。
4 我哋住喺此地上嘅帳幕,如背負重擔而歎息;並唔係想脫下地上嘅身體,係想着上屬天嘅身體,使嗰個必朽壞嘅被生命取代。
5 上帝親自準備代我哋嚟適應此變化;佢將聖靈賜俾我哋做保證。
6 所以,我哋常時坦然無懼。知道,只要重住喺此身體時,我哋就遠離主為我哋預備嘅房屋。
7 因為我哋活着係憑信心,唔係憑眼見。
8 我哋有充分嘅勇氣,情願離開地上嘅身體,與主一齊居住。
9 更重要嘅係,無論在地上嘅身體內,或着上屬天嘅身體,我哋都要得主嘅喜悦。
10 因為我哋必要企喺基督面前,受佢審判。每人會按照喺世上嘅行為,或善或惡,本身接受報應。
透過基督同上帝復和11 我哋既然知道點樣敬畏主,就用嚟勸人。上帝完全認識我哋;我希望你哋亦從心裏認識我,
12 我哋唔係想再向你哋推薦自己,係要你哋覺得有理由以我哋為榮,使你哋有話回答嗰啲只重外貌、唔重品格嘅人。
13 若我哋真係癲狂嘅話,係為上帝嘅緣故;若我哋神志清醒,係為你哋。
14 基督嘅愛支配我哋,因為我哋明白,一個人為所有嘅人死,就眾人都死。
15 佢為所有嘅人死,係使嗰啲活着嘅人唔再為自己活,而係為嗰位替佢哋死而復生嘅基督活。
16 所以,我哋從此唔再根據人嘅標準嚟睇人。雖然我哋曾根據人嘅標準嚟睇基督,現今我哋唔再噉樣做。
17 無論邊個,有基督嘅生命就係新造嘅人;舊嘅已過,新嘅已經來臨。
18 呢一切都係上帝嘅作為;佢透過基督使我哋能同上帝復和,又俾傳此福音嘅職份過我哋。
19 我哋所傳嘅信息係:上帝透過基督同人類建立和好嘅關係。佢唔追究佢哋嘅過犯,並且將佢同人和好嘅信息交託我哋。
20 為噉,我哋做基督嘅特使。上帝親自透過我哋勸勉你哋:我哋代基督請求你哋,等上帝改變你哋,使你哋能同佢復和。
21 基督係無罪嘅,但為咗我哋,上帝使佢擔負我哋嘅罪,使我哋透過佢能稱義。