Library · yue

哥林多後書 6

1 我哋係上帝嘅同工;勸你哋:既然已經接受上帝嘅恩典,就唔好使此恩典落空。

2 因為上帝話:「喺接納時,我應允你;喺拯救日,我幫助你。」現今就係接納上帝恩惠嘅時刻;今日係上帝拯救嘅日子!

3 我哋唔願意被人詆毁我哋嘅工作,亦唔妨礙任何人。

4 喺一切事上表明我哋係上帝嘅僕人,我哋忍受各樣患難、貧窮、困苦。

5 我哋曾遭鞭打,監禁,暴民嘅騷擾;我哋勞苦,失眼,捱餓。

6 我哋用純潔、知識、忍耐、仁慈,透過聖靈、無偽嘅愛、

7 真理嘅信息,同上帝嘅大能,嚟表明我哋係上帝嘅僕人。我哋用正義做武器,攻擊敵人,亦保衛自己。

8 我哋受尊敬,亦被侮辱;受責罵,亦被稱讚。人哋講我哋係騙子,其實我哋講嘅係老實話;

9 話我哋寂寂無聞,其實係家傳戶曉;話我哋死,其實係生活嘅。我哋受刑罰,但不致喪命;

10 憂傷,但常有喜樂;貧窮,但使好多人富足;好似一無所有,但樣樣都有。

11 哥林多人呀!我哋向你哋推心置腹,坦白說話。

12 唔係我哋狹窄,而係你哋心胸狹窄。

13 我對你哋講,好似對自己嘅仔女講一樣;你哋要寬宏大量,用我哋對待你哋嘅器量嚟對待我哋。

防備異敎嘅影響

14 唔好同唔信嘅人相配;佢哋同你哋係不能同負一軛。正同邪點能合作呢?光明同黑暗點能共存呢?

15 基督同魔鬼點能協調呢?信同唔信嘅人有乜嘢共同嘅地方呢?

16 上帝嘅聖殿同偶像點能並立呢?我哋係永生上帝嘅聖殿。正如上帝話:「我要同我嘅子民同住,喺佢哋中往來。我要做佢哋嘅上帝;佢哋要做我嘅子民。」

17 主話:你哋要離開佢哋,從佢哋中出嚟,唔好沾染不潔之物,我就接納你哋。

18 我要做你哋嘅父;你哋要做我嘅仔女。呢啲話係我全能嘅主講嘅。