加拉太書 1
1 我保羅。做使徒唔係由人嘅選召,亦唔係人委任嘅,而係耶穌基督同使佢從死裏復生嘅父上帝指派嘅。
2 我共我同在嘅兄弟寫信俾加拉太嘅各敎會。
3 願我哋父上帝同主耶穌基督賜恩典、平安俾你哋!
4 基督為救我哋脫離此邪惡嘅時代,遵照父上帝嘅旨意,為我哋嘅罪獻上自己。
5 願榮耀歸於上帝,世世無窮!阿們。
惟一嘅福音6 我好驚奇,你哋竟然咁輕易離棄透過基督嘅恩典選召你哋嘅上帝,去隨從另一種福音!
7 其實,並冇另一種福音。我噉樣講,因為有人嚟騷擾你哋,想更改基督嘅福音。
8 任何人,即使係我,或係天上嘅天使,若係向你哋宣傳另一種福音,同我以前傳俾你哋嘅唔同,佢就應該被咒詛!
9 我哋已經講過,現今再講:無論邊個,若係向你哋傳另一種福音,同你哋以前所領受嘅唔同,佢應受咒詛!
10 我噉樣講係想贏得人嘅稱讚咩?唔係!我所要嘅係上帝嘅嘉許!唔通我想搏人歡喜咩?若我仍然想搏人歡喜,我就唔係基督嘅僕人。
保羅點樣成為使徒11 兄弟呀,我要你哋知道,我傳嘅福音唔係出於人嘅意思。
12 我冇從任何人接受此福音,亦冇請敎過任何人,係耶穌基督親自啟示我嘅。
13 我以前信猶太敎時嘅行事為人,你哋都好清楚。我盡力迫害及摧殘上帝嘅敎會。
14 喺同輩猶太人中,我比其他人更遵行猶太敎規,更熱心遵奉祖宗傳統嘅敎訓。
15 但係,由於上帝嘅恩典,喺我出世以前,佢已經揀選我,召我嚟事奉佢。
16 當佢決定向我啟示佢嘅仔,使我喺異邦人中傳有關基督嘅福音時,我並冇向任何人請敎,
17 亦冇去耶路撒冷見嗰啲比我先做使徒嘅人,而係即刻去亞拉伯,後來返到大馬色。
18 過咗三年,我致去耶路撒冷見彼得,同佢住咗十五日。
19 除咗主嘅兄弟雅各,我冇見過其他嘅使徒。
20 我講嘅係真話;喺上帝前,我冇講大話。
21 後來,我到敘利亞同基利家境內唔同嘅地方。
22 嗰時,猶太省各敎會嘅信徒都唔認識我。
23 佢哋淨係聽見人哋話:「嗰個以前迫害我哋嘅人,現今反而傳佢以前要拆毁嘅信仰!」
24 為噉,佢哋為我嘅緣故讚美上帝!