加拉太書 2
保羅同其他使徒1 十四年後,我同巴拿巴返到耶路撒冷,亦帶住提多一齊去。
2 我去耶路撒冷係遵照主嘅啟示。喺私下會見嗰啲領袖時,我向佢哋講明我喺異邦人中所傳嘅福音。我唔願意我過去或目前嘅工作落空。
3 同我一齊去嘅提多,雖然係希尼人,亦冇被迫接受割禮。
4 有啲偽兄弟偷偷加入敎會要佢接受割禮;呢啲人好似偵探噉樣混入嚟,想打探我哋因信基督耶穌而享有嘅自由,目的係想奴役我哋。
5 但為要使你哋保存福音嘅真理,我哋對呢班人一啲都唔讓步。
6 嗰啲被認為有名望嘅領袖(佢哋地位高低,我唔在乎;因為上帝係唔用外表嚟判斷人),並冇俾我乜嘢新嘅指示;
7 反轉,佢哋睇見上帝將傳福音俾異邦人嘅任務交俾我,好似佢將傳福音俾猶太人嘅任務交俾彼得一樣。
8 上帝用佢嘅能力使我成為異邦人嘅使徒,好似佢使彼得成為猶太人嘅使徒一樣。
9 雅各、彼得、約翰,三位有名望嘅領袖,既然知道上帝將此特別嘅使命交俾我,就同巴拿巴及我握手;成為同工,我哋就同意,巴拿巴同我到異邦人中工作,而佢哋喺猶太人中工作。
10 佢哋只求我哋記得猶太人中窮人嘅需要;此事正係我一向努力做嘅。
保羅喺安提阿責備彼得11 以後,彼得到安提阿;因為佢有明顯嘅錯誤,我就公開指責佢。
12 喺雅各打發嚟嘅人未到達以前,彼得同異邦嘅信徒一齊食飯。但係嗰啲人一到,佢就退去,唔敢再同佢哋一齊食飯,因為怕嗰啲主張異邦人必要接受割禮嘅人。
13 其他嘅猶太信徒亦跟住彼得,好似冇原則嘅人一樣;連巴拿巴亦受佢哋影響。
14 我一睇出佢哋唔遵循福音真理,就當眾對彼得話:「你係猶太人,若跟隨異邦人行事,唔似猶太人。你點可以勉強異邦人過猶太人嘅生活呢?」
猶太人同異邦人都因信得教15 我哋生出嚟就係猶太人,唔係異邦罪人。
16 既知道,人得稱義係因信耶穌基督,唔係因遵行摩西嘅律法。所以我哋信基督等可以因信得稱義,唔係靠遵行律法。因為冇人能靠遵行律法而稱義。
17 噉樣,若我哋尋求因信基督而得稱義嘅人仍然同異邦人一樣,仍舊係罪人,豈唔係等於話基督係支持罪咩?絕對唔係!
18 若我再建造自己所拆毁嘅,就證明我係犯罪嘅。
19 就律法嚟講,我係被律法處死嘅,為使我能為上帝而活。我已經與基督同釘死喺十字架上,
20 現今生活嘅唔再係我自己,係基督喺我生命裏生活。我係藉住信上帝之子而生活;佢愛我,為我捨命。
21 我唔拒絕上帝嘅恩典。若人得稱義係藉律法,基督就係徒然受死!