加拉太書 6
分擔重擔1 兄弟呀,若有人偶然犯錯,你哋屬靈嘅人就要用溫和嘅方法糾正佢。你哋自己亦要小心,免致亦受引誘。
2 要分擔重擔,噉樣就係遵行基督嘅命令。
3 一無所有而自以為了不起嘅人只係呃自己。
4 每個人都應該省察自己嘅行為;若有好行為,佢可以引以為榮,唔需要同他人嘅成就嚟比較。
5 每個人應該擔自己嘅擔。
6 喺基督真道上受敎導嘅人應該供給敎導佢嘅,同佢分享一切美好嘅嘢。
7 你哋唔好自欺,亦唔好呃上帝。人種乜嘢,就收成乜嘢。
8 佢若為滿足自己嘅情慾而撒種,佢會收成死亡;佢若為得聖靈嘅喜悅而撒種,佢會收穫永生。
9 所以,我哋行善,唔好喪志;我哋若唔灰心,時候到就有收成。
10 為噉,無論何時,有機會就應該為公眾做有益嘅事,對喺信仰上同屬一家嘅人更應該噉樣。
11 你哋睇,呢啲大嘅字係我親筆寫俾你哋嘅!
12 鍾意喺外表上炫耀嘅人就係勉強你哋接受割禮嘅人。佢噉樣做,無非係怕為基督嘅十字架受迫害。
13 其實,連接受割禮嘅人亦唔遵守律法;佢哋勉強你哋受割禮,係要誇耀你哋喺外表嘅儀式上已經屈服。
14 至於我,我唔誇耀第二樣,只誇耀我哋主耶穌基督嘅十字架。我因十字架,世界向我已經釘死喺十字架上;我對世界亦已經釘死喺十字架上。
15 受唔受割禮都唔算得乜嘢;重要嘅係我哋要成為新造嘅人。
16 願所有遵照此原則嘅人,同一切上帝嘅子民,都同樣得到平安及憐憫!
17 從今以後,唔好喺呢啲事上搵我麻煩!因為我身上帶住耶穌嘅印記。
18 兄弟呀,願我哋嘅主耶穌基督賜恩典俾你哋眾人!阿們。