以弗所書 6
父母同仔女嘅關係1 做仔女嘅,要聽父母嘅話;呢啲係基督徒嘅本份。
2 「要孝敬父母,使你凡事亨通,喺世上享長壽!」呢條係第一條帶應許嘅誡命。
3 拼於上節
4 做父親嘅,唔好激嬲仔女,要用主嘅教導嚟養育栽培佢哋。
主僕嘅關係5 做奴僕嘅,要畏懼戰兢,專心服從世上嘅主人,好似事奉基督一樣;
6 唔單喺他人注意時噉樣做,想搏人嘅歡喜,而係做基督嘅奴僕,從心裏遵行上帝嘅旨意。
7 你哋要甘心樂意盡奴僕嘅本份,好似服事主,唔係服事人。
8 要知道,無論奴僕或主人,主都要照各人嘅好行為報答佢。
9 做主人嘅,亦要好待奴僕,唔好威嚇佢哋。要知道,你哋同你哋嘅奴僕同有一位喺上嘅主人;佢用同樣嘅標準對待每一個人,並不偏待人。
上帝所賜嘅全副裝備10 最後,你哋要倚靠主嘅大能力做堅強嘅人。
11 你哋要穿戴上帝賜嘅全副軍裝,使你哋能企穩,嚟抵擋魔鬼嘅詭計。
12 因為我哋唔係對抗有血肉嘅人,係對抗天上嘅邪靈,此黑暗世代嘅執政者、掌權者,同宇宙間邪惡嘅勢力爭戰。
13 為噉,你哋要用上帝賜嘅武器裝備自己,喺險惡嘅日子能夠抵抗敵人嘅攻擊,戰鬥到底,始終守住陣地。
14 所以,你哋要準備好。用真理做腰帶,正義做護胸甲,
15 隨時宣揚和平嘅福音做鞋着上。
16 成日揸住信心嘅盾牌,使你哋能抵禦邪惡者射出嘅一切火箭。
17 又用救恩做頭盔,用上帝嘅道做聖靈賜嘅寶劍。
18 你哋要喺禱告中求上帝嘅幫助,常時隨從聖靈嘅帶領禱告。凡事警醒,唔好放鬆;不停為眾信徒禱告。
19 亦要為我禱告,求上帝賜我適當嘅話,喺我應講時,能大膽開口傳揚福音嘅奧祕。
20 雖然我帶住鎖鍊,但我係為福音嘅緣故做特使。你哋要祈求主賜我勇氣講應該講嘅話。
問候同祝福21 推基古會將一切有關我嘅事話你哋知,等你哋知道我嘅情況。佢係我哋親愛、忠心事奉主嘅兄弟。
22 我派佢去你哋處嘅目的,係要你哋知道我哋呢處嘅情況,使你哋得到鼓勵。
23 願父上帝同主耶穌基督賜平安、仁愛,同信心俾眾兄弟。
24 願上帝賜恩典俾所有恆心愛我哋嘅主耶穌基督嘅人!