以弗所書 5
生活喺光明裏1 既然你哋係上帝所愛嘅仔女,你哋必要效法佢。
2 你哋嘅生活要以愛心行事,如基督愛我哋,為我哋捨命,做馨香嘅禮物同祭品獻俾上帝。
3 至於淫亂、污穢,或貪心嘅事,喺你哋中連提都唔好提,因為你哋係聖徒。
4 你哋亦不可講淫猥、愚妄,或下流嘅話;要講多謝上帝嘅話。
5 淫亂、污穢,或貪心嘅人(貪心等於拜偶像)絕對不能成為基督同上帝國嘅子民。
6 唔好俾任何人用空口白話呃你哋;正為此事,上帝嘅忿怒會臨到悖逆嘅人身上。
7 因此,唔好同呢啲人來往。
8 你哋原本喺黑暗裏,但係自從成為主嘅信徒,你哋就喺光明裏。你哋嘅生活必要好似光明嘅人。
9 光明結出一切豐盛嘅果實,即係良善、公義,同真誠。
10 要諗清楚乜嘢係主所喜悅嘅事。
11 唔好在黑暗中做無益嘅事,反要揭發呢種事。
12 佢哋在暗中做嘅事,連提及都係可恥嘅!
13 凡事被公開時,真相就顯露,因為凡被光顯露嘅事會成為光明嘅。
14 所以有話:瞓着嘅人呀!醒過嚟喇,從死人中起來!基督就光照你哋。
15 你哋嘅行為要謹慎。唔好學無知嘅人,要學智慧嘅人。
16 要愛惜光陰,因為目前嘅日子好邪惡。
17 唔好做糊塗人,要明白主嘅旨意係乜嘢。
18 唔好醉酒,醉酒係會敗壞人嘅;要被聖靈充滿!
19 用詩篇、聖詩、靈歌對唱;要從心裏發出音樂,讚美主,向佢歌唱。
20 要奉我哋主耶穌基督嘅名為各樣事感謝父上帝。
夫妻嘅關係21 你哋要彼此順服,因為你哋係敬畏基督嘅。
22 做妻嘅,要順服自己嘅丈夫,好似順服主。
23 因為丈夫係妻嘅頭,如基督係教會-佢嘅身體-嘅頭,亦係教會嘅救主。
24 教會如何順服基督,妻亦要凡事順服丈夫。
25 做丈夫嘅,要愛自己嘅妻,好似基督愛教會,為教會捨己。
26 用水藉着道洗淨教會,使教會聖潔-
27 榮美、純潔、冇瑕疵、冇任何污點或皺紋-獻俾自己。
28 丈夫應該愛自己嘅妻,好似愛自己嘅身體一樣;愛妻就係愛自己。
29 冇人憎惡自己嘅身體;總係保養、照顧佢,好似基督對教會一樣;
30 因為我哋係佢身嘅肢體。
31 聖經話:「為噉,人要離開父母,同妻結合,兩個人成為一體。」
32 呢節經文啟示極大嘅奧祕。係指基督同教會嘅關係嚟講嘅,
33 但亦係用喺你哋身上;丈夫必要愛妻,如愛自己一樣,妻亦必要敬重丈夫。