腓利比書 4
保羅勸導1 兄弟啊,你哋係我所親愛嘅,所想念嘅!你哋係我嘅喜愛,我嘅冠冕。親愛嘅兄弟呀,你哋要倚靠主企得穩。
2 友阿爹氏同循都基氏兩位信主嘅姊妹,我勸你哋要同心。
3 我忠實嘅同工,我亦要求你幫助佢哋兩位;因為佢哋喺福音嘅工作上同我、革利免,及其他同工一齊勞苦過;呢啲人嘅名已經記喺上帝嘅生命冊。
4 你哋要因為同主連結而常時喜樂。我再講,你哋要喜樂。
5 你哋亦要向眾人表現謙讓。主快嚟咯。
6 你哋應該一無掛慮;喺禱告將你哋需要嘅話俾上帝知,用多謝嘅心祈求。
7 上帝所賜超越人所能理解嘅平安,會透過基督耶穌,保守你哋嘅心懷意念。
8 最後,兄弟呀,你哋要常時留意美善同值得讚揚嘅事。一切真實、高尚、公司、純潔、可愛,同光榮嘅事都應該重視。
9 你哋從我所學習,領受,或聽到,睇到嘅言行,都要實行。賜平安嘅上帝就會與你哋同在!
多謝話10 我喺主嘅生命裏有極大嘅喜樂!因為現今你哋再一次供應我。其實,你哋一向關心我,只係冇機會表示。
11 我噉樣講,唔係因為我缺少乜嘢;我已經學會對現狀滿足。
12 我知道點樣過貧困嘅生活,點樣過富裕嘅生活。我已經得到祕訣,隨時隨地,飽足或飢餓,豐富或缺乏,我都知足。
13 藉基督所賜嘅能力,我能適應任何情況。
14 但,喺我困難時,你哋嚟幫助我,我好感激。
15 你哋腓立比人都知,喺我傳福音嘅初期,我離開馬其頓;嗰時只有你哋嘅教會幫助我,有份於我嘅盈虧得失。
16 喺帖撒羅尼迦時,唔只一次,我有需要,你哋就嚟幫助我。
17 唔係我貪圖乜嘢餽贈,係希望你哋多得盈餘,撥入你哋自己嘅賬上。
18 呢啲就係你哋送俾我一切禮物嘅收據;你哋所送嘅超過我嘅需要。我從以巴弗提受咗你哋帶嚟好多豐富嘅禮物,好似芬芳的香氣,係上帝所悅納嘅祭品。
19 我嘅上帝會照佢喺基督耶穌裏嘅豐富將你哋所需要嘅一切賜俾你哋。
20 願榮耀歸俾我哋嘅父上帝,世世無窮,阿們。
最後嘅問候21 請向各位屬基督耶穌嘅信徒問安。同我喺一齊嘅兄弟問候你哋。
22 所有嘅信徒,特別係皇宮裏嘅人,都問候你哋!
23 願主耶穌基督賜恩典俾你哋!