腓利比書 3
真正嘅義1 兄弟啊,我重有話要講。願主賜喜樂俾你哋!向你哋重複我從前講過嘅話,對我冇麻煩,但對你哋好有益。
2 你哋要提防作惡嘅人,狐羣狗黨,即係嗰啲堅持要割自己身體嘅人。
3 其實,接受真割禮嘅,唔喺佢哋,係我哋。因為我哋透過上帝嘅靈嚟敬拜;我哋所誇耀嘅係基督耶穌。
4 我唔倚靠任何人外表嘅禮儀。若有人以為佢可以倚靠外表嘅禮儀,我更可以。
5 我出世第八日就受割禮。我生嚟就係以色列人,屬便雅憫支派,係血統純粹嘅希伯來人。就遵守猶太教規嚟講,我屬法利賽派;
6 就熱心嚟講,我曾迫害教會。所以,若遵守摩西律法就算係義嘅話,我並冇可以被指責嘅地方。
7 但我一向認為有益嘅,現今為基督嘅緣故,我將呢啲都當做有損。
8 唔只噉樣,我更將萬事當作有損,因為我以認識主基督耶穌為至寶。為咗佢,我拋棄一切,當作垃圾,為要贏得基督,
9 完全與佢連結。我唔再有嗰種因遵守律法而有嘅義。我現今有嘅義係因信基督而有嘅,係上帝所賜嘅,係以信為根據嘅。
10 我只渴望認識基督,體驗佢嘅復生能力,同佢一同受苦,並且經歷佢嘅死,
11 我希望我自己亦能從死裏復生。
向住目標奔跑12 呢啲唔係話我已經成功,或已經完全。我繼續奔跑,只求贏得嗰個獎賞;其實,為要使我達到呢個目標,耶穌基督已經贏得我在先。
13 兄弟啊,我並唔認為我已經達到此目標;我只專心喺一件事:係忘記背後,全力追求前面嘅事。
14 我向目標直跑,為要得到獎賞;此獎賞係屬天嘅新生命,係上帝透過基督耶穌呼召我去領受嘅。
15 所以,我哋中所有靈性成熟嘅人都要有噉樣嘅想法;若你哋有唔同嘅想法,上帝會清楚指示你哋。
16 無論如何,我哋要依照我哋一向所達到嘅真理向前走。
17 兄弟啊,你哋要繼續效法我。我哋已經為你哋留下榜樣;你哋要學習效法我哋嘅人。
18 我已經多次勸你哋,現今再一次流淚勸你哋:有啲人嘅行為使佢哋成為基督十字架嘅仇敵。
19 佢哋嘅結局係滅亡,因為佢哋嘅神就係自己嘅肚。佢哋以可恥嘅事為榮,專思想世上嘅事。
20 但我哋係天上嘅公民;一心等候我哋嘅救主,耶穌基督從天降臨。
21 佢將運用嗰啲使萬有歸服佢嘅能力,嚟改變我哋脆弱必死嘅身體,使我哋同佢一樣,有榮耀嘅身體。