Library · yue

帖撒羅尼迦前書 1

1 我保羅;同西拉、提摩太寫信俾帖撒羅尼迦教會-屬父上帝同主耶穌基督嘅信徒。願你哋都得到恩典同平安!

帖撒羅尼迦人嘅生活同信心

2 我哋常時為你哋眾人多謝上帝,喺禱告裏不斷提起你哋,

3 喺我哋嘅父上帝前記念你哋點樣將所信嘅實行出嚟,點樣用愛心辛勞工作,又點樣點守對主耶穌基督嘅盼望。

4 兄弟呀,我哋知上帝愛你哋,揀選你哋。

5 我哋將此福音傳俾你哋,唔單只用言語,亦係倚靠聖靈嘅能力,並且根據對福音嘅確信。你哋都知道,我哋喺你哋處時嘅生活係點樣;一切無非係為你哋嘅好處。

6 你哋效法我哋,亦效法主;雖然你哋遭受大難,仍然喺聖靈所賜嘅喜樂中領受信息。

7 為噉,你哋成為馬其頓同亞該亞所有信徒嘅模範。

8 主嘅信息係由你哋處傳開嘅。你哋對上帝嘅信心,唔單只傳到馬其頓同亞該亞,亦傳到遠近各處;呢啲實在唔使我哋多講。

9 眾人都傳講:我哋訪問你哋時,你哋點樣接待我哋,又點樣離棄偶像,歸向上帝,事奉呢位又活又真嘅上帝,

10 並且盼望佢嘅仔耶穌由天降臨。耶穌就係上帝使佢從死裏復生嘅嗰一位;佢使我哋脫離嗰啲將要臨到上帝嘅義憤。