帖撒羅尼迦前書 5
準備迎接主再來1 兄弟呀,關於呢件事發生嘅時間日期,唔需要寫信話你哋知;
2 因為你哋自己知,主再來嘅日子好似賊喺夜晚忽然嚟到一樣。
3 當眾人話「一切平安無事」時,災難會突然臨到,好似陣痛突然臨到快生產嘅女人一樣。佢哋必不能逃脫嘅。
4 兄弟呀。你哋並唔係生活喺黑暗裏;以致嗰日會好似賊一樣突然嚟到。
5 你哋都係光明嘅人,屬於白晝嘅。我哋唔屬於黑夜,唔係生活喺黑暗裏。
6 所以,我哋唔應該好似他人噉樣瞓覺;我哋要警醒戒備。
7 瞓覺嘅人喺夜晚瞓;酒鬼喺夜晚醉酒。
8 既然我哋屬於白晝,就應該戒備。我哋要用信同愛當作護胸嘅盔甲着上,用得救嘅盼望作頭盔戴上。
9 上帝唔係揀選我哋嚟受佢嘅懲罰,係要我哋透過主耶穌基督得拯救。
10 基督為我哋死,使我哋無論或生或死,都能喺佢再來時同佢一齊生活。
11 為噉,你哋要互相鼓勵,彼此幫助,好似你哋現今嘅一樣。
最後嘅指示同問候12 兄弟呀,我哋求你哋,要尊重喺你哋中辛勞工作-主所選召嚟指導教訓你哋嘅人。
13 為佢哋嘅工作,你哋應該用最大嘅敬意同愛心對待佢哋。你哋自己亦要和睦相處。
14 兄弟呀,我哋勸你哋,要警告懶惰嘅人,鼓勵灰心嘅人,扶助軟弱嘅人,並且用耐心對待每個人。
15 要謹慎,不可以惡報惡,要常時彼此關心,為別人嘅好處着想。
16 要常時喜樂,
17 不住禱告,
18 凡事感謝。呢啲係上帝為你哋屬基督耶穌嘅人所定嘅旨意。
19 唔好抑制聖靈嘅工作;
20 唔好輕視傳講信息嘅工作。
21 要詳細審察每一件事,持守嗰啲美善嘅,
22 棄絕一切邪惡。
23 願賜平安俾我哋嘅上帝使你哋完全聖潔,保守你哋嘅靈、魂及身體,喺我哋主耶穌基督再來時完整,冇缺點。
24 選召你哋嘅上帝係信實可靠嘅;佢必成全此事。
25 兄弟呀,請為我哋禱告。
26 要用聖潔嘅親吻向兄弟問安。
27 我奉主嘅名吩咐你哋,要向所有嘅兄弟宣讀此信。
28 願我哋嘅主耶穌基督賜恩典俾你哋!