Library · yue

帖撒羅尼迦前書 4

上帝所嘉許嘅生活

1 最後,兄弟呀,你哋已經從我哋身上學到點樣喺生活上得上帝嘅喜歡-其實,你哋一向都噉樣做-現今,我哋奉主耶穌嘅名勸你哋,求你哋必定要更加努力。

2 你哋都知道,我哋靠主耶穌所教導你哋嘅係乜嘢。

3 上帝嘅旨意係要你哋聖潔,絕對冇淫亂嘅事。

4 每人都要知依照聖潔合宜嘅方法與自己嘅妻相處。

5 唔好放縱情慾,好似唔認識上帝嘅異教徒噉。

6 喺此事上,唔可以有對唔住兄弟或佔佢便宜嘅行為。我哋已經向你哋講過,警告過:主必懲罰嗰啲犯呢種過錯嘅人。

7 上帝選召我哋,唔係要我哋生活喺淫亂中,係要我哋聖潔。

8 所以拒絶呢種教訓嘅,唔係拒絕人,係拒絕賜聖靈俾你哋嘅上帝。

9 關於愛兄弟嘅事,我唔需要寫信同你哋討論;上帝已經教導你哋點樣彼此相愛。

10 而你哋亦照此教導對待全馬其頓嘅兄弟。但我仍然勸你哋要更加努力,

11 立志安份守己,親手作工嚟維持自己嘅生活,好似我哋從前勸導你哋嘅,

12 等你哋得到非信徒嘅尊敬,亦唔使倚賴別人嘅供給。

主要再來

13 兄弟呀,關於已死嘅人,我哋希望你哋知道,免致你哋憂傷,好似嗰啲冇盼望嘅人。

14 我哋相信耶穌死而復生,所以,相信上帝亦要使嗰啲信耶穌而已死嘅人同佢一齊復生。

15 我哋現今照主嘅教導話你哋知:我哋喺主再來嗰日仍然生存嘅人,唔會比嗰啲已經死嘅人先與主相會。

16 嗰時,將有呼叫嘅聲音、天使長嘅聲音、上帝號筒嘅響聲,主必親自從天降落。嗰啲信基督而已死嘅人要先復生;

17 跟住,我哋仍然生存嘅人要同佢哋一齊被提到雲裏,喺空中與主相會。從此,我哋就永遠與主同在。

18 所以,你哋要用呢啲話彼此安慰。