Library · yue

帖撒羅尼迦後書 1

1 我保羅,同西拉、提摩太寫信俾帖撒羅尼迦教會-屬於我哋嘅父上帝同主耶穌基督嘅信徒。

2 願父上帝同主耶穌基督賜恩典、平安俾你哋

基督再來時嘅審判

3 兄弟呀,我哋應該常時為你哋感謝上帝。呢啲係當然嘅;因為你哋嘅信心大有進步,彼此相愛嘅心亦大大增加。

4 為噉,我哋喺上帝嘅各教會都誇耀你哋。你哋經歷一切嘅迫害、患難時,仍然相信,仍然忍耐;呢啲就係我哋所誇耀嘅。

5 呢啲正係上帝公義審判嘅證據,證明你哋配得享受上帝國嘅福樂。你哋就係為此國度繼續忍受苦難。

6 上帝要執行公義。使迫害你哋嘅人遭受患難;

7 亦要使受苦嘅人同我哋一齊得到釋放。主耶穌同佢大能嘅天使從天上喺火燄中顯現時,上帝就必執行此事。

8 上帝必懲罰唔承認佢、唔聽從有關我哋主耶穌福音嘅人。

9 主再來嘅日子,嗰啲人要受懲罰,永遠滅亡,從主面前同榮耀嘅大能隔絕。

10 嗰日,上帝要從佢嘅聖徒得榮耀,而且接受佢哋嘅讚美。你哋亦喺佢哋中,因為你哋相信我哋傳嘅福音。

11 為此,我哋不停為你哋禱告,求我哋嘅上帝使你哋不至於辜負佢嘅呼召。願上帝用佢嘅能力,幫助你哋實現一切向善嘅志願,成就你哋憑信心作嘅工夫。

12 噉樣,我哋主耶穌基督嘅名會從你哋嘅工作得到榮耀,而你哋亦要從佢得到榮耀;呢啲係透過我哋嘅上帝同主耶穌基督嘅恩典而得到嘅。