Library · yue

帖撒羅尼迦後書 2

嗰個不法者

1 兄弟呀,關於我哋主耶穌基督嘅再來,同埋佢聚集我哋同佢相會嘅事,我要求你哋,

2 唔好輕易被「主再來嘅日子到喇」呢種講法困擾。或者有人話呢種講法係嚟自我哋傳講嘅信息或者講道時講嘅,甚至有人話係我哋信上噉樣寫嘅。

3 唔好俾任何人用任何手段呃咗你哋。因為嗰個日子來到之前必先有最後嘅反叛;嗰個註定滅亡嘅不法者要出現。

4 佢反對一切被人稱為神明或崇拜嘅對象,將自己抬高喺一切之上;甚至去坐喺上帝嘅聖殿裏,自稱為上帝。

5 你哋唔記得咩?我同你哋喺一齊時已經將此事話你哋知。

6 嗰個阻止此事喺現今發生嘅係乜嘢,你哋係知道。時機一到,嗰個不法者就出現。

7 嗰個神秘嘅不法者已經開始工作;但,等到嗰個阻止此事嘅離開之後,此事致會發生。

8 嗰時,不法者必出現,但主耶穌再來時,要用口吹氣殺死佢,又用顯現嘅光輝消滅佢。

9 不法者要帶住撒但嘅權力嚟,行各種奇蹟異能,虛假嘅預兆,

10 並且對將滅亡嘅人使用各種詭計,因為佢哋唔接受,唔喜愛使佢哋得救嘅真理。

11 為噉,上帝俾佢哋一種強烈嘅錯覺,等佢哋去信從虛謊。

12 結果,一切唔信真理、以罪惡為樂嘅人將被定罪。

被揀選接受救恩

13 主所愛嘅兄弟呀!我哋應該常時為你哋感謝上帝;因為上帝揀選你哋,透過聖靈成聖嘅工作同你哋對真理嘅相信,使你哋得救。

14 透過我哋所傳俾你哋嘅福音,上帝呼召你哋;嚟分享我哋主耶穌基督嘅榮耀。

15 所以,兄弟呀,要有堅定嘅信心,對我哋所教導嘅真理,無論係傳講嘅或係書信中所寫嘅,你哋都要堅守。

16 上帝我愛哋,由於佢嘅恩典,佢賜俾我哋永恆嘅毅力同美好嘅盼望。願呢位父上帝同我哋嘅主耶穌基督,

17 激勵你哋,使你哋有勇氣嚟宣傳同實行一切美善嘅事。