帖撒羅尼迦後書 3
為我哋禱告1 最後,兄弟呀,請為我哋禱告,使主嘅信息快傳開,並且得到尊重,好似喺你哋中被傳開,得尊重一樣。
2 亦請你哋祈求上帝救我哋脫離邪惡嘅人,因為唔係每個人都信從主。
3 但主係信實嘅;佢會使你哋堅強,令邪惡者唔侵害到你哋。
4 主使我哋對你哋有信心,我哋確信你哋正在實行,並且繼續實行我哋所吩咐嘅。
5 願主引導你哋,使你哋對上帝嘅愛有更深嘅體驗,並且有基督所賜嘅耐心。
盡工作嘅義務6 兄弟呀,我哋奉主耶穌基督嘅名命令你哋:要遠離所有游手好閒、唔遵守我哋教導嘅兄弟。
7 你哋自己知得好清楚,應該點樣效法我哋。我哋與你哋同在時,並冇偷懶,
8 亦冇白食人哋嘅飯,反而辛苦勞碌,日夜做工,免致連累你哋。
9 我哋噉樣做,唔係我哋冇權要求生活上嘅供給,係要做你哋嘅榜樣。
10 我哋喺你哋處時講過:「唔做工嘅人唔好食飯。」
11 我哋講呢一句話,係因為聽見你哋中有人游手好閒,成日乜嘢事都唔做,專好管閒事。
12 噉樣嘅人,我哋奉主耶穌基督嘅名警告佢哋,命令佢哋,要安靜落嚟,親手作工嚟維持生活。
13 但係,兄弟呀,你哋要積極做好事。
14 或者有人唔肯服從我哋喺呢封信所吩咐嘅話;噉樣嘅人,你哋要小心,唔好同佢一齊,使佢覺得慚愧。
15 但,唔好將佢當做敵人,要好似對待兄弟一樣勸導佢。
祝福16 願賜平安嘅主隨時用各種方法賜平安俾你哋。願主與你哋眾人同在。
17 我親筆寫:「問你哋安。」我每封信都噉樣寫;呢啲係我嘅筆跡。
18 願我哋嘅主耶穌基督賜恩典俾你哋眾人。