Library · yue

提摩太前書 2

教會裏嘅崇拜

1 首先,我勸你,要為所有嘅人向上帝祈求,禱告,代求,感恩;

2 亦要為君王同有權位嘅人禱告,使我哋能過安寧、和平、端正、虔敬嘅生活。

3 呢啲係好嘅,係我哋嘅救主上帝所喜歡嘅。

4 上帝想人人得救,認識真理。

5 此真理話:只有一位上帝,喺上帝同人之間有一位中保,即係成為人嘅基督耶穌;

6 佢犧牲自己使人類得自由。此事,喺時機成熟時上帝必證明出來。

7 為此,我奉差遣做異邦人嘅傳道人、使徒,同教師,使佢哋相信並認識真理。我冇講大話;我講嘅都係真嘅!

8 喺各地方嘅聚會,我希望男人禱告,虔誠舉起手嚟禱告,唔發嬲,冇爭論。

9 我希望女人喺衣飾方面樸素大方;唔好用奇異嘅髮型、金飾珠寶,或高價嘅衫做裝飾。

10 要有好行為,同自己所表白嘅信仰相稱。

11 女人要沉默學習,事事謙卑。

12 我唔准女人教導人,或管轄男人;佢哋要沉默。

13 因為上帝先創造亞當,然後夏娃。

14 被誘惑嘅唔係亞當,係女人;佢被誘惑,違背上帝嘅律法。

15 女人若安份守己,持守信心、愛心、聖潔,就會因生兒育女而得救。