Library · yue

提摩太前書 6

1 做奴僕嘅,應當尊敬自己嘅主人,免致有人藉口詆毀上帝嘅名同我哋嘅教訓。

2 主人若係信徒,做奴僕嘅唔好因佢哋係主內兄弟就怠慢佢哋,反而要更殷勤伺候,因為受伺候得益嘅人係佢哋所愛嘅信徒。你應該教訓同勸導此事:

3 若有人傳唔正確嘅教義,同我哋主耶穌基督嗰啲正確嘅信息及我哋敬虔嘅道理唔符合嘅,

4 就係自高自大,極端無知。呢種人顯然鍾意辯論,喺字句上吹毛求疵,因而造成嫉妒、紛爭、毀謗、猜疑,

5 引起心術不正、喪失真理嘅人無休無止噉爭論。喺佢哋嘅心目中,敬虔不過係發財嘅門路!

6 一個人若有敬虔同知足嘅心可以使佢富有。

7 我哋到此世界,冇帶乜嘢嚟;又不能從此世界帶走乜嘢?

8 有衣有食,就該知足。

9 貪圖富厚嘅人係陷喺誘惑裏,被好多無知同有害嘅慾望綁住,終於沉倫毀滅。

10 貪錢係萬惡嘅根源。有人因貪錢而離開信仰嘅道路,盡嘗痛苦,心靈破碎。

俾提摩太嘅指示

11 但你係上帝所重用嘅人,要遠避呢一切。追求正義、敬虔、信心、愛心、忍耐,同溫柔。

12 喺信仰嘅競賽上要盡力奔跑,要自己贏得永生;係為此目的,你蒙上帝呼召,喺好多證人前公開承認美好嘅信仰。

13 喺本丟彼拉多前作證嘅基督耶穌,同喺賜生命俾萬物嘅上帝前,我吩咐你:

14 要忠誠,無可指責遵守所受嘅命令,直到我哋嘅主耶穌基督顯現嗰日。

15 喺時機成熟時上帝要使佢顯現;上帝係可受頌讚、獨一無二嘅主宰,萬王之王、萬主之主。

16 惟有佢係不朽不滅。住喺人不能靠近嘅光裏;冇人見過佢,亦冇人能睇見佢。願尊貴同永恆嘅主權都歸佢!阿們。

17 你要警戒今世富足嘅人,唔好驕傲。唔好將希望寄託喺唔可靠嘅財物上,要倚靠嗰位將萬物厚賜俾我哋享受嘅上帝。

18 要吩咐嘅行善,多做好事,慷慨施捨,隨時濟助。

19 為自己積存財寶,為將來建立堅固嘅根基,持定真正嘅生命。

20 提摩太呀!你要保守你所接受嘅託付。避免唔敬虔嘅空談同所謂「知識」嘅荒謬爭論。

21 有人以為佢哋已經有呢種知識,喺信仰上迷失方向。願上帝賜恩典俾你哋!